Semeytany.kz – Абай облысының әкімі Берік Уәли Семей қаласындағы жол жөндеу жұмыстарымен айналысатын «Гордорстрой» ЖШС-нің асфальт-бетон зауытында болды.
Мекеме аумағында сағатына 200 тонна өнім шығаратын жаңа АБЗ NLB3000 және 60 тонна өнім өндіретін 2008 жылғы АБЗ ДС-185 зауыттары жұмыс істеп тұр. Бұған дейінгі QLB 2000 қондырғысы Аягөз ауданына көшірілген. Зауыт техникалық базасын жаңарту аясында 40 миллион теңгеге жуық қаржыға 60-қа жуық техника мен құрылғы сатып алған.
Кәсіпорын аумағында жол-құрылыс материалдарының сапасын жылдам анықтайтын аккредиттелген зертхана бар. Сонымен қатар, әрқайсысы 200 тоннадан үш резервуар мен 120 тонналық битум қоймасы жұмыс істейді.
Аймақ басшысы зауыттың жұмысын жоғары бағалап, мұндай кәсіпорындардың жол құрылысы сапасын арттырудағы рөлі зор екенін атап өтті. Биыл өңірде жалпы ұзындығы 391 шақырым жол жөндеу жоспарланғанын айтқан облыс әкімі, облыс орталығында техникалық әлеуеті жоғары зауыттың орналасуы маңызды екенін жеткізді.
