Semeytany.kz – Бүгін таңертең облыс әкімі Берік Уәли Семей қаласындағы бірқатар нысандарды аралады. Алдымен ол Қарағайлы ықшам ауданында салынып жатқан жаңа саябақтың құрылыс барысын тексерді.
Аумағы 5 гектарды құрайтын саябақта серуен жолдары, киіз үй пішініндегі сахна, мәдени-көпшілік іс-шараларға арналған алаңдар мен демалыс аймақтары қарастырылады. Оның 2,6 гектарына жасыл желек отырғызылып, автоматты суғару жүйесі орнатылмақ.
Мердігер компания өкілі Мереке Берікұлының айтуынша, құрылысқа 13 арнайы техника мен 20-ға жуық жұмысшы тартылған. Жобаны қыркүйек айында, қала күні қарсаңында аяқтау жоспарланып отыр.
Облыс әкімі саябақтың сапалы әрі уақытылы салынуы маңызды екенін атап өтіп, мұндай демалыс орындары тек Қарағайлы үшін емес, Энергетик кентінің тұрғындары үшін де үлкен маңызға ие болатынын айтты. Алдағы уақытта Семей қаласындағы басқа саябақтарды да кезең-кезеңімен жаңарту көзделіп отыр.
