Мемлекет басшысы «Қазақстанның әлеуметтік жаңғыртылуы: «Жалпыға Ортақ Еңбек Қоғамына қарай 20 қадам» мақаласында: «Жалпыға Ортақ Еңбек Қоғамы идеясы көз жетпейтін көкжиекте ойлап табылмаған. Бұл – практикалық, прагматикалық идея. Ол маған тіпті етене жақын, өйткені мен, қазақстандықтар жақсы білетіндей, өзімнің кәсіби жолымды «ақ саусақтар» секілді кабинетте де, паркетте де емес, жұмысшы-металлург ретінде бастадым»,- деп, Елбасымыз баршамызды ел игілігі жолындағы еңбекке шақырады, бүгінде еңбек шешуші ұлттық фактор екенін ұғындырады.
{jcomments on}Осыған орай, Көкпекті аудандық мәслихатының депутаттары Самарқан Жотабаев, Күлпану Қожаева, Елена Сивхарт және мәслихат аппаратының басшысы Нұргүл Фахрутдинова мен бас маман-заңгер Венера Назикеева аудан орталығы Көкпекті ауылындағы Құмар Раев атындағы балалар үйінде болып, олардың еңбекке баулу және күнделікті тұрмысқа бейімделуімен танысып қайтты.
Аудандық білім бөлімінің мамандары мен балалар үйінің тәрбиешілері келушілерге балалар тұрмысы жайлы баяндады. Балалар үйі басшыларының мәліметіне сүйенсек, ұжым балаларды еңбекке машықтандыруды жүйелі түрде жүргізеді. Олар өз бөлмелерін және аулаларын күтіп, таза ұстайды. Сонымен қатар тәрбиеші Б.Көбелековтің жетекші-лігімен тәрбиеленуші ұлдар бірігіп «Жанашыр» командасын құрып, команда мүшелері осы мекеменің ардагерлері мен жалғызбасты зейнеткерлеріне үй шаруашылығына жәрдемдесуді жолға қойған.
Балалар және педагогтармен болған әңгіме барысында депутаттар болашақ ұрпақтың тәрбиесі елдің әрбір өңіріндегі халық қалаулыларының назарында екенін атап өтті. 80 жылдан астам тарихы бар бұл үйдің айқын мақсаты, Еңбек Ері, атақты педагог, Балалар үйінің бұрынғы басшысы Жақия Шайжүнісовтің кезіндегідей, «Еңбек басты тәрбиеші» деген ұран.
Аудандық маслихат хатшысы Рәмзи Беспаев:
-Бүгінгі мақсат — балалар үйі қабырғасынан шығатын жасөспірімдерді алдағы өмірге да-йындап шығару. Ержеткен ұл ертең үй иесі болып, өз бетімен шаруашылық жүргізе білуі қажет. Бойжеткен қыз үшін үй шаруашылығын игеріп, ине сабақтап, ас пісіре білу — өмір талабы. Сондықтан балалар үйі жеткіншектеріне еңбек тәрбиесі лайықты берілсе, олар тұр- мысқа бейім, өз бетімен тіршілік етуге дайын болса, балалар үйінің басты міндеті орындал-ғаны. Өкінішке орай, көп жағдайда балалар үйі түлектерінің өмірге бейімделе алмай, тағдыр тәлкегіне түскенін көзіміз көріп жүр. Депутаттар мақсаты — осы мәселені түбегейлі қарастырып, оны шешу жолдарын табу, — дейді.
Мәслихат депутаты Самарқан Жотабаев былтырғы жылы Самар аграрлық колледжінде оқитын Кұмар Раев атындағы балалар үйінің бірнеше түлегіне мамандықтарына сәйкес жұмыс берді. Жатар орындары, тамақтанулары тегін, кестеге сәйкес еңбекақы тағайындалды. Алайда дене еңбегімен шынықпаған жас жігіттер жұмыстан гөрі демалуды таңдап, жазғы лагерьге кетіп қалыпты. Енді Самарқан Жотабаев балалар үйінің жас жеткіншектерін балауса кезінен баулымақ мақсатта олар үшін қысқамерзімді еңбек лагерьлерін ұйымдастырмақ.
Айта кетерлік жайт — бұл мәселе аудан деңгейінде бірнеше рет көтерілген. Атқарылып жатқан жұмыстар да баршылық. Солардың бірі атақты омарташы Александр Шаров кейінгі үш-төрт жыл аясында бал арасымен жұмыс істегісі келген балаларды жазғы каникул уақытында демалдырып, омарташы еңбегімен таныстырады. Әріптестерінің атқарып жатқан өнегелі ісін көрген мәслихат депутаты Асқар Қажығалиев та игі істен тыс қалмай, түйе мен жылқы баққанға бейімі бар балаларды тәрбиелесем бе деген ыңғай білдірді.
Қайрат МӘЛҒАЖДАРОВ,
Көкпекті ауданы.
