Semeytany.kz — Қазақстандық агросарапшы Төлеутай Рахымбеков алдағы жылдары сиыр етінің бағасы келісіне 15–20 мың теңгеге жетуі ықтимал екенін айтты. Ол бұл болжамын Tenge Talks YouTube-арнасына берген сұхбатында айтып, тіпті Қазақстан Өзбекстаннан ет импорттауға мәжбүр болуы мүмкін екенін ескертті.
Сарапшы 2019 жылы да ет құны 5–6 мың теңгеге дейін өсетінін болжағанын, сол пікірінің расталғанын еске салды. Оның сөзінше, қазір малдың 80–90 пайызы шағын шаруашылықтардың қолында, олардың көбінде техника жоқ, шығынның негізгі бөлігі шөп пен жемге жұмсалады. Қуаңшылық болған жағдайда баға бірден шарықтайды.
Бұған дейін Мәжіліс депутаты Ринат Зайытов ауылдағы фермерлер етті 3 мың теңгеден өткізсе, қалада оның бағасы 6 мың теңгеге жететініне наразы болып, пайда делдалдардың қолында қалып отырғанын айтқан еді.
Ал Сауда және интеграция министрі Арман Шаққалиев «ет 6 мың теңгеден асты» деген пікірге нақты мысалмен жауап берді: бір апта бұрын өзі базарда жаяны 4 200 теңгеге алғанын, ал онлайн саудада оралған кәуапқа арналған филе 5 700 теңге шамасында болуы мүмкін екенін жеткізді. Министрдің айтуынша, баға тұтынушы таңдауы мен өнім түріне қарай құбылады, мемлекеттің міндеті — әр санатқа қолжетімділік пен таңдау ұсыну.
Материал Stan.kz мәліметтері негізінде дайындалды.
