Өткен жұма күні Семей қалалық салауатты өмір салтын қалыптастыру орталығының ұйымдастыруымен баспасөз мәслихаты өтті. Күн тәртібінде қызылша, тұмау сынды маусымдық аурулардың алдын алу мәселелері қаралды.
{jcomments on}«Қазақстан Республикасы Тұтынушылардың құқықтарын қорғау агенттігінің Шығыс Қазақстан облысы тұтынушылардың құқықтарын қорғау департаментінің Семей қалалық тұтынушылардың құқықтарын қорғау басқармасы» РММ басшысы Бағлан Чегедековтің айтуынша, өткен жылдармен салыстырғанда ағымдағы жылы қызылша дертімен ауыру көп тіркелген.
— Қаламызда 2014 жылы 7 жағдай тіркелсе, үстіміздегі жылдың қаңтар айында 12 жағдай зертханада дәлелденіп, ақпанда 26 дерт тіркелген. Біздің қаламызда ғана емес, еліміз, тіпті әлем бойынша бұл дерт дендеп тұр,- дейді Бағлан Салихұлы.
Қызылшаның көп тарауына байланысты алдын алу шаралары қолға алынған. Республика бойынша 16 ақпан мен 28 наурыз аралығында қызылшаға қарсы профилактика жүргізу жоспарланған. Мамандардың айтуынша, ауырмаудың басты жолы дертке қарсы екпе алу екен.
— Қызылша – ауа-тамшы жолымен берілетін, жедел жұқпалы ауру. Күз және қыс айларында жиі таралады. Алдын алудың жалғыз жолы – қызылшаға қарсы егілу,- деген жұқпалы ауруларды емдеу ісі бойынша қаланың бас дәрігері Эльвира Исабаева қызылша дерті жайлы айтты.
Мамандардың пікіріне сүйенсек, қызылша вирусы адам ағзасына тыныс алу жолдары арқылы түсіп, қанға енеді. Қан арқылы әртүрлі ағза мүшелеріне тарап, тамақ безін, бауырды, өкпені, жілік майын зақымдайды. Тұмау ауруларына ұқсайтын белгілерден басталады, науқастың дене қызуы көтеріледі, тамаққа тәбеті төмендейді, әлсіздік, жөтел, түшкіру, көзі қызарып, жасаурайды, мұрыннан су ағады. Бұл жағдай 2-3 күнге созылады, содан соң қызыл бірігетін бөртпелер, бастапқыда бетте, құлақтың артында пайда болады, содан соң барлық денеге тарайды. Ауру айналасындағылар үшін денесіне бөртпелер пайда болғанға дейін 4 күн, пайда болғаннан кейін 4 күн ішінде залалды болып саналады.
— 1930 жылдары, екпе жүргізілмеген тұста, тұрғындар қызылшамен жаппай ауырған. Тіпті асқынуы салдарынан өмірлерімен қоштасқан да. Кейіннен, екпе жүргізілген жылдары, аурушаңдық күрт төмендеген. Негізі, қызылша 15-19 жас аралығындағы жасөспірімдерде жиі кездеседі. Екпе жүргізілген соң, бесінші, алтыншы күндері дене қызуы көтеріледі. Бұл қызылша емес, ағзаның екпеге жақсы белгі беруі,- деген Эльвира Қалқаманқызы екпе жүргізудің маңызы зор екенін атап өтті.
Баспасөз мәслихаты барысында мамандар ойларын ортаға салып, жалпы, қызылша мен тұмау ауруларын болдырмау үшін аурудың алдын алу тұрғысында өздерінің пікірлерін білдірді.
Әйгерім СӘРСЕНҒАЛИ,
«Семей таңы»
