Уақыттың ағысы, халықтың жарысы, тағысын тағысы күнделікті күйбеңге кісендеп, руханият дейтін мөлдір әлемге бір сәтке болса да бұрылуға мүмкіндік бермей жататыны жұмбақ емес. Таңның атуы мен күннің батуын аңдыған тірлігімізге қарап қынжылатынымыз да бар кейде. Оның үстіне толассыз тасқынмен келіп жатқан ақпараттар санамызға сызат салмай тұрмайды. Осындайда әрбір ойлы жан жүрек тыныштығын іздеп, аласұрып жататыны анық. Әркімде болатын жағдай. Ал енді осыдан шығар жол қайсы?!
{jcomments on}Театр бағзыдан адам баласының ішкі айнасының қызметін атқарып келеді. Киімілгіштен басталатын мәдениет ордасы сан алуан тағдырлар тоғысып жататын сахнаға шақырады да тұрады. Ақ пен қара, бақ пен нала алысып жататын қым-қуыт та кіршіксіз әлемге қызыға да, қызғана да қарайсың. Түмен түрлі талқыға түсіп, табанымыз тозғанда, көңіліміз елегізгенде, театр дейтін тамашаны талғажау ететініміз бар.
Үстіміздегі жылдың 21 ақпанында америкалық жазушы Вина Дельмардың «Өкінішті өмір» шығармасын қаламыздың «Дариға-ай» жастар театрының орындауында тамашаладық. Күйіндік…Сүйіндік… Қойылымның басты тақырыбы – бүгінгі таңда келелі мәселе болып тұрған нарыққа байланған халық. Бес баласына сеніп баспанасын кепілге қойып, өтемін жасай алмаған жасамыс ата-ана, ана құрсағына сыйғанмен, ата-анасын үйіне сыйдырмаған имансыз бала, кердең келін, кесір немере, кесапат күйеу… бәрі-бәрі адамдықты аңсатып, қатыгез қоғамды көз алдыңа әкеледі. Ертеде ата-бабамыз «балапан – басына, тұрымтай – тұсына дейтін заман болады» деуші еді, тура соның бейнесін сахнадан көрдік. Егілдік…езілдік… сезіндік… Ойлы қойылымға келген көрермен ішінде көкейіне салмақты ой түймей кеткені жоқ. Бар болса, кемде-кем шығар. Себебі қарттар үйін сағалаған аналарымыз, әр үйді паналаған әкелеріміз жоқ емес қой бүгін… Бұл, біле білсек, трагедия.
Меніңше, театр өз мақсатына жетті. Киелі өнер ордасының негізгі көздегені де — адамның рухани моншасына айналу, жүрегін тазарту.
Көрермен ретінде «Дариға-ай» жастар театрының қойылымдарын бос жібермеймін. Шыңғыс Айтматовтың «Ақ кемесі», Рэй Кунидің «№99», Ә.Тауасаровтың «Махаббат аралы», қайсысын алсақ та, тәрбиелік мәні мен актерлер шеберлігі астасып жататын жақсы қойылымдар. Театр ұжымының еңбегіне табыс, шығармашылықтарына шарықтау тілеймін!
Тілек ҚҰРМЕТҰЛЫ,
Семей қаласы.
