Міне, сахна төрінен төгілген әуезді үн жан дүниеңді шымырлата төгіліп барып, шырқау биікте ұзақ қалықтады. Тыңдаған адамның санасын ұйытып, сезімтал жүректі шымырлатып, жан сарайыңды ғажайып күйге бөледі. Талғампаз әншінің мөлдір дауыс иіріміне іліккен ән сырлы қалпын жоғалтпастан тыңдарманын тәнті етіп, өзіңді сырға толы өнер әлеміне жетелей түседі. Ғажайып сұлулықты ән аясына сыйғызып, сол арқылы жүрегінің үнін, ән құдіретін шашау шығармай жеткізуде әнші шеберлігінде мін жоқ дерсің. Бұл «Қаламқас» халық ән-би ансамблінің күміскөмей әншісі Бақыт Шағатаева еді.
{jcomments on}Құт қонып, қыдыр дарыған Абай елі топырағында, қарапайым еңбек адамдары Шағатай Әрхамұлы мен Сарқыт Смағұлованың шаңырағында 1948 жылы дүниеге келген Бақыт Шағатайқызының о бастан өнер жолын мақсат тұтуы да заңды еді. Ол — әйгілі Құнанбай қажының ұрпағы, ұлы Абайдың інісі Ысқақтың шөбересі. Бақыт Шағатайқызының атасы Әрхам Ысқақов та, өзінің анасы Сарқыт Смағұлқызы да асқан әнші еді. Осылайша оған атаның тәлімі, ананың өнегесі дарып, балалық шағынан өскен ортасы, ұшқан ұясының әсерімен өнер әлеміне ерекше ден қойған еді. Мектеп қабырғасынан түлеп ұшып, 1966 жылы Алматыдағы Мемлекеттік Қыздар педагогикалық институтының музыка факультетіне оқуға түскен Бақыт Шағатайқызы оқуын үздік аяқтап, институт қабырғасында қалу туралы оқытушыларының өтінішіне де қарамай, туған топырағына қайтып оралады. Келісімен еңбекке араласып, мектеп-интернатта ұстаздық қызмет атқарады. Мәулетхан, Ғалия атты жас ұстаздармен бірге 1972 жылы аудандық деңгейдегі музыка мектебінің іргесін қалайды. Осы жылы ашылған «Қаламқас» халық ән-би ансамбліне жұмысқа қабылданады. Туған өлкесінің мәдениетінің өркендеуіне өлшеусіз үлес қосып, «Дала бұлбұлы» деген халық бағасына ие болып, көрерменінің алғысына кенеледі. Әйгілі «Қаламқастың» мүшесі бола жүріп, шетелдіктерге қазақтың өркендеген өрелі өнерін паш етті. Ансамбль өзінің шырқау биігінде 1984 жылы Венгрияға, 1986 жылы Түркияға, 1996 жылы Қытай еліне, мұнан өзге бұрынғы Кеңес Одағының бірнеше республикаларына концерттік сапарлармен барды. Бақыт Шағатайқызының репертуарында көптеген халық әндері, халық композиторларының әндері, Латиф Хамиди, Евгений Брусиловский, Нұрғиса Тілендиевтің шығармалары көптеп кездеседі. Ариялардан бірқатар операларды, «Абай» операсындағы Ажардың ариясын, «Қыз Жібек» операсындағы Жібектің әнін, «Біржан-Сара» операсынан ариялар орындайды. Күміскөмей әншінің дауысы колоратуралық сопраноға жатады.
Сахна саңлағы 1976 жылы өткен Бүкілодақтық әншілер фестивалінде лауреат атанды. Мәдениет саласының майталманы Бақыт Шағатайқызы 1989 жылы «Қазақ КСР-нің еңбек сіңірген мәдениет қызметкері» атағын иеленсе, 2012 жылы “Қазақстанның еңбек сіңірген қайраткері” атанып, өз еңбегінің жемісін көрді. Бұдан өзге құрметтері де жетерлік. 2011 жылы Қазақстан әйелдері съезіне делегат болып қатысып, Елбасының қабылдауында болып қайтты. Республика Тәуелсіздігінің 20 жылдығына арналған мерекелік медалінің иегері, сонымен қатар Абай ауданының Құрметті азаматы. Бұл атақтар Бақыт Шағатайқызының ұзақ жылдар бойғы маңдай терінің өтеуі. Жұмсақ мінезінен айнымайтын аяулы перзентіне берген халқының бағасы бұл. 1991 жылы Елбасымыз Н.Ә.Назарбаевқа бата берген айтулы тұлға, халық ақыны Шәкір Әбеновтің киелі әулетіне келін болып түскен Бақыт Шағатайқызы — бүгінде таусылмас ұрпақ қызығына кенеліп отырған ұлағатты әже, ардақты ана. Ұрпақтарының ішінде өнер әлемінде бағы жанып, анасының жолын қуған перзенті Арай Әбенова бүгінгі таңда Шығыс Әскери гарнизоны ансамблінің әншісі болып қызмет атқарады.
Туған елін әсем әнімен әлдилеген күміскөмей дара әнші, “Қаламқастың бұлбұлы” Бақыт Шағатаеваға біз де жан жылуына толы мереке сәтінде мықты денсаулық пен зор шығармашылық табыстар тілейміз!
Бұлбұл ӘНУАРБЕКҚЫЗЫ,
“Семей таңы”
