Semeytany.kz – Ақсуат аудандық орталық ауруханасында қыркүйек айында басталған күрделі жөндеу облыстық бюджет есебінен жүргізіліп жатыр. Жұмыс шеңберінде ғимараттың шатыры толық ауыстырылып, сыртқы қасбеті жылу үнемдейтін материалмен қапталуда. Алдағы кезеңде нысан сырты металл сайдингпен қапталып, бірінші қабаттағы есіктер мен едендер жаңарады. Жөндеу 2026 жылғы 2 қаңтарда толық аяқталуы жоспарланған.
Аурухана 2010 жылы салынған және бұған дейін күрделі жөндеу көрмеген. Қазір мекемеде 320 медицина қызметкері еңбек етеді.
Соңғы екі жылдың ішінде мекеме заманауи аппаратурамен толықты: бейнеэндоскопиялық, офтальмологиялық және кардиологиялық жабдықтар орнатылды, жаңа туған нәрестелерге арналған инкубаторлар мен қан қысымын тәулік бойы бақылау жүйелері іске қосылды.
2024 жылы «Ауылдық жерлерде денсаулық сақтауды жаңғырту» ұлттық пилоттық жобасы аясында ауруханаға қарасты бірқатар жаңа нысан пайдалануға берілді. Екпін мен Үштөбе ауылдарында дәрігерлік емдеу бөлімшелері, Кіндікті ауылында фельдшерлік-акушерлік пункт, сондай-ақ Сұлутал, Қызыл жұлдыз, Айнабастау және Көктүбек ауылдарында медициналық пункттер ашылды.
Жалпы, аудандық аурухана құрылымында 8 дәрігерлік емдеу бөлімшесі, 1 фельдшерлік-акушерлік пункт және 9 медициналық пункт жұмыс істейді.
