Наурыз айының 13 — 14 күндері Семей қаласы әкімдігінің қолдауымен қалалық Достық үйінде Қазақстан халқы Ассамблеясының 20 жылдығы, Татар қоғамдық бірлес-тігінің құрылуына 25 жыл толуына арналып мәдени іс-шаралар ұйымдастырылды.
{jcomments on}Екі күнге жоспарланған мереке татар орталығына қарасты музейдің салтанатты түрде ашылуымен басталды. Осыдан жиырма жыл бұрын жұмысын бастаған музей биыл жәдігерлермен толыға түсіп, жаңартылған бөлмеге орналастырылған. Семей қалалық мәдениет және тілдерді дамыту бөлімінің басшысы Берік Көпбаев биылғы жыл елімізде “Қазақстан халқы Ассамблеясы жылы” деп жарияланғанына, аталмыш мәдени шараның сол мерейлі мезеттің аясында ұйымдастырылып отырғанына тоқталып, Қазақстан үшін бірлік пен татулықтың қашан да маңызды екенін атап өтті. Анатолий Еременко Татар қоғамдық бірлестігінің құрылғандығы мен музейдің ашылған сәттерінен сыр шертті. Содан кейін Татар қоғамының мүшелері қонақтарға музейді таныстырып, қойылған жәдігерлер жайлы ақпараттандырды.
Дәл осы күні мерекелік шара «Семей татарларының мәдениеті мен тарихы: бүгіні мен ертеңі» атты шығармашылық және ізденіс жолындағы жұмыстардың аймақтық сайысымен сабақтасты. Татар қоғамдық бірлестігінің төрайымы Камила Исмаилова жиылған жұртты мерейтоймен құттықтап, сайысқа қатысушыларға сәттілік тіледі.
— Бұл жыл мерейлі мерекелерімен ерекше. Ақпанның алтысында, түрі мен түсіне, тілі мен дініне қарамастан, барлық ұлт пен ұлыстың өкілдерін жанына топтастырған Қазақстан халқы Ассамблеясы жылының басталуын атап өттік. Достығымызды одан әрі нығайтып, татулығымызды ту етудеміз. Бүгінгі сайыс — осының айқын дәлелі. Сайысқа қатысушыларға сәттілік тілеймін,- деді К.Исмаилова.
Ұйымдастырылған сайыс жастарға татар ұлтының өткені мен бүгінінен ақпарат беріп, тарихынан сусындату, ұлттық болмысы мен салт-дәстүрлерін насихаттау, мәдениетінен хабардар ету мақсатын көздеген. Қазылар алқасының төрайымы, ШҚО жаңа тарих құжаттамалар орталығының директоры Гүлнар Қасымованың айтуынша, қала мектептерінің 8 — 11 сынып оқушылары мен колледждерден отыз бес үміткер байқауда бақ сынауға өтініш білдірген. Байқаудың алғашқы бөлімінде Семей қаласының әлеуметтік-экономикалық даму жолындағы татар диаспорасының орны, татар отбасында бала тәрбиелеудің ерекшеліктері кеңінен талқыланды. Ал екінші «Бір шаңырақ астында» атты бөлімде Достық үйінің маңызы мен мақсаты, татар ұлтының мұрасы мен ұлттық құндылықтары жайлы қатысушылардың зерттеу баяндамалары тыңдалса, үшінші «Татар халқының мәдениеті мен тұрмысы» бөлімінде олардың дастарқаны, асханасы мен азаматшаларының асханалық қалпағы турасында айтылды.
Мерекелік шараның екінші күні «Татар қызы — 2015» байқауымен басталды. 2007 жылдан бастап дәстүрлі түрде өткізіліп келе жатқан шараның мақсаты – татар халқының ұлттық болмысын ашу, тілі мен мәдениетін, ұлттық өнерлері мен салтын насихаттау. Өз тарихынан сусындаған, дәстүрін сақтай білетін, заманауи үлгіде де ойлай алатын татар қызын анықтау байқаудың міндеті болды. Ол сайысқа қала мектептерінің оқушылары, арнаулы және жоғары оқу орындарының студенттері қатысты. «Татар қызы-2015» атанғысы келген арулар өздерін таныстырып, ұлттық салма тағамын әзірлеу арқылы аспаздық өнерлерін ортаға салды. Дефиле сынында бас киім үлгісін көрсетсе, зияткерлік сайыста білім дәрежелерін байқатты. Соңғы сын — өнер бөлімінде әннен шашу шашып, биге кезек берді. Бас жүлдеден үміткер 10 қыздың барлығы дерлік байқауға үлкен дайындықпен қатысып, жеңімпаз болуға лайықты екендіктерін аңғартып, Гүлия Насырова бас жүлдені иеленді.
Сонымен қатар бұл күні ұйымдастырылған «Татар асханасының үздік тағамы» байқауы да жоғары дәрежеде өтті. Мұнда ертеректегі ас мәзірін ұстана отырып әзірленген, заманауи үлгіде безендірілген ұлттық тағамдар таныстырылды. Үздік деп танылған асхана шеберлеріне «Татар асханасының жұлдызы» тәжі мен Гран-при, ал-ғашқы үштіктен көрінген нәзік жандыларға дипломдар берілсе, барлық қатысушыларға алғыс хаттар тапсырылды.
Бұл сайыс-байқаулармен қатар, екі күн бойы Татар қоғамдық бірлестігінің мұрындық болуымен ұлттық өнерлерін насихаттайтын қолөнер бұйымдары және сурет, кітап көрмелері ұйымдастырылды.
Әйгерім СӘРСЕНҒАЛИ,
«Семей таңы»
