Елбасы Нұрсұлтан Назарбаев «Нұрлы жол – болашаққа бастар жол» атты Жолдауында ел экономикасын барлық сала бойынша, атап айтқанда, ауқымды инфрақұрылымдық жобалар – көліктік — логистикалық инфрақұрылым, жол, мемлекеттік жалға берілетін пәтерлер, энергетикалық қуатты арттыру нысандарын салу, тұрғын үй — коммуналдық шаруашылықты жаңғырту сынды тың тапсырмалар берді. Елбасы Жолдауында айтылған тапсырмаларды орындауда Семей қаласының да алар үлес салмағы аз емес.
{jcomments on}Семей қаласының әкімі Айбек Кәрімов халық алдындағы есептік баяндамасында құрылыс саласының экономиканы дамытуда алар орны ерекше екенін бірнеше мәрте айтқан болатын. Аталған саланың өзектілігіне назар аударған шаһар басшысы алда атқарылар шаруаларға да тоқталып, жыл сайын Семей қаласында балабақша, мектеп, ауруханалар сынды әлеуметтік нысандардан өзге, 300 мың шаршы метр аумақты алатын тұрғын үйлер тұрғызылатынын жеткізді. Осы және өзге де міндеттерді орындау үшін, Семей қаласының Бас жоспары дайындалып бекітілген еді.
Ауқымды құрылыс жұмыстарын жүргізу үшін, сапалы құрылыс материалдары қажет болатыны белгілі. Бұл тұрғыдан алғанда Семейдің мүмкіндігі мол. Өйткені жоспарлы кең ауқымды құрылыс жұмыстарына қажетті материалдар жергілікті тауар өндірушілермен өндіріледі. Қаламыздағы осындай ірі кәсіпорындардың бірі ретінде жұмысын сонау 1958 жылы бастаған «Семей» цемент зауытын айтуға болады.
Цемент зауыты — әртүрлі өнімдерді, оның ішінде жалпы құрылысқа қажетті (ПЦ 400-Д20) және жоғарғы маркілі (ПЦ 400-Д0-Н, ПЦ 500-Д0 и ПЦ АЦИ 400) өнімдерді өндіруге қауқарлы кәсіпорын. Зауыт өнімдері отандық нарықта айтарлықтай сұранысқа ие. Кәсіпорын өнімін Астана, Алматы қалалары мен еліміздің Солтүстік өңірлері жоғары бағалайды. Сондықтан да зауыт мемлекеттік жобалардың жүзеге асуына белсенді араласып келеді. Мәселен, республикалық маңызы бар Астана — Бурабай тасжолы құрылысына өз өнімдерін жеткізген.
Өнімнің сапасына келетін болсақ, оған төмендегі мысалдар дәлел бола алады. Зауытта өндірілген өнімдер Семейдегі Ертіс өзені арқылы өтетін аспалы көпірдің құрылысына, «Медеу» мұз айдыны, сондай-ақ Алматы қаласындағы селден қорғау бөгеті мен әуежай құрылысына, Астана қаласындағы Бейбітшілік пен келісім сарайы, «Бәйтерек» және көптеген басқа да нысандарға пайдаланылды.
Үкіметтің импортты ауыстыру бағдарламасы бойынша кәсіпорын құрамында әктас және цемент пен басқа да сусымалы материалдарды салуға арналған қаптарды шығаратын цех жұмыс жасайды. Шағын зауыттың жылына 10 млн. қап шығаруға мүмкіндігі бар. Бұл — зауыт мұқтаждығын қамтамасыз етіп қана қоймай, артылған өнімдерді нарыққа шығаруға мүмкіндік беріп отыр.
2006 жылдан бері зауыт ең жоғары сапада жалпы құрылыс және арнайы цемент түрлерін өндіретін, Орта Азиядағы ірі цемент холдингі United Cement Group (UCG) құрамына кірді. «Семей» цемент зауыты холдингте жетекші орын алып отыр. Өйткені аталған кәсіпорын жалпы өнімнің 25 пайызын шығаруда. Осының нәтижесінде зауыттың дамуына ерекше назар аударылып, кәсіпорынды дамытуға арналған бес және жеті жылдық даму бағдарламасы қабылданды.
Алдағы жылдары зауыт өндіріс көлемін кем дегенде төрт есеге арттыруды көздеп отыр. Ал бұған 7 млн. теңге АҚШ доллары көлемінде инвестиция тарту көзделуде. Өткен жылы зауыттың екі ірі пешіне электрлі сүзгілер орнату жұмыстары аяқталды. Биыл зауыт бюджетінде атал-ған құрылғыны тағы бір пешке орнату жоспарланып отыр. Бұл жұмыстар цемент өндірісінен бөлінген улы заттарды төмендету үшін атқарылып жатқанын айта кетуіміз керек. «Семей» цемент зауыты осылайша қоршаған ортаның тазалығын сақтауға зор үлес қосып отыр. Мұндай бастама өзге өндіріс орындарына үлгі боларлықтай.
Асан МЫРЗАХАНОВ,
«Семей таңы»
