Қазақстанның көпұлтты халқының татулығы, ынтымақтастығы, бейбітшілігі – ең басты байлығы. Қазақ халқы — ержүрек, достыққа адал, бауырмал, қонақжай халық. Әр кезеңдерде елімізден пана іздеп келген өзге ұлттардың бәрін бауырына басып, төрінен орын беріп, қандай қиын уақытта қол ұштарын созып, бір үзім нанды бөліп жеді. Осылай, қаймағы бұзылмаған қазақ жері көпұлтты мемлекетке айналды. Бүгін елімізде 130-дан астам ұлт пен ұлыстың өкілдері бір тудың астында тату — тәтті ғұмыр кешуде.
{jcomments on}Бейбітшілік пен бірліктің берекелі ордасына айналған ел іргесінің берік болуы ондағы өмір сүрген әр шаңыраққа байланысты. Өңірімізде тәуелсіз еліміздің тірлігіне тілеулес болып, Қазақстанды туған Отанындай санайтын түрлі ұлт өкілдерінен құралған отбасылар жетерлік. Бір шаңырақтың астында бір ұлттың баласындай болған олар өзара түсіністікпен, сыйластықта өмір сүруде. Солардың бірі – Семей қаласының іргесіндегі Мұқыр ауылында тұратын Бергеневтер отбасы.
Көпбалалы жанұяның отағасы Астана қаласында энергетика саласында еңбек етсе, жұбайы бала тәрбиесімен үйінде. Олар алты бала тәрбиелеп, екі ұлттың мәдениетін дамытып, салт-дәстүрін ұстанып отыр. Серік пен Ольга отбасын құрғандарына 20 жылдай болған. Отағасы орыс қызымен бір ауылда туып-өскен. Тағдырлары тоғысып, көңілдері жарасып, жанұя болды. Орыс қызы сыпайы мінезі, мейірімді жүзімен баурап алған. Серіктің отбасы келінін мақтан тұтады.
Бергеневтер отбасында бала тәр-биесіне ерекше көңіл бөлінеді. Балалары қазақша білім алады. Үйдің үлкені Темірлан қаладағы медицина колледжінің студенті. Сәтін салса, оқуын үздік аяқтап, білімін жоғары оқу орнында жалғастырмақ ниетте. Одан кейінгі Мәдина, Әсел, Марат мектеп қабыр-ғасында. Ал сүт кенжелері Аман мен Есен биыл 3-ке толды. “Күміс алқа” иегері ұлттық салт — дәстүрлер мен мерекелерге, ас мәзіріне де ерекше ынта қойып, құрметпен қарайтындарын айтады.
— Алдымен ұлымыз өмірге келді. Сосын қыз бала болғанын қаладық. Кейін тағы да ұл бала қаладық, бірақ тағы қыз бала дүниеге келді. Осылайша, барлығы Алланың қалауымен болып жатты. Жалғыз адамға, әрине, отбасын асырау қиын. Қазір отбасымызда жолдасым ғана жұмыс жасайды. Жанұяның қамын жасап, Астана қаласында нәпақасын тауып жүр. Мен балалардың тәрбиесімен үйде отырмын. Өмірде қиындықтар болады. Бірақ соған мойымай, балаларымызды жеткізіп отырмыз, — дейді Ольга Потехина.
Отбасында барлық балалар қазақша сөйлейді және қазақ мектебінде білім алады. Үлгілі отбасында ұлтқа бөліну деген жоқ. Қос ұлттың мейрамдары бірдей тойланады. Көпбалалы отбасы бала тәрбиесін маңызды міндет санайды. Сондықтан да ата-ананың алға қойған мақсаттары осы бағытқа негізделген.
— Бала — өмірдің жалғасы, ертеңгі жарқын болашақтың, ерлі-зайыптылардың тіреуі, діңгегі. Олардың алғашқы қадам басулары, алғаш рет сөйлей бастағандары — барлығы біз үшін қуаныш. Солар үшін өмір сүріп, солар үшін еңбектеніп жатырмыз. Ендігі арманымыз — осы балаларымызға ел қатарлы білім берсек дейміз. Өмірде өз орындарын тапса екен. Ең бастысы — отағасының амандығы. Балаларымның әкесі дені сау болып, барлығымызды қуаныш- қа бөлеп жүре берсін, — дейді қазақтың Ольга келіні.
Серік пен Ольга да көпбалалы отбасынан шыққан. Сондықтанда балаларды дұрыс тәрбиелеуді жақсы біледі. Серіктің шаңырағындағы басты қағидасы – татулық. Көпұлтты жанұя бола тұра, ұлттық құндылықтарын жоғалтпай, бейбітшілікті жоғары бағалайтын осындай отбасылар мемлекетіміздің мықты тірегі саналады.
Асан МЫРЗАХАНОВ,
«Семей таңы»
