Семей қаласының орталық саябағында, жыл сайынғы дәстүрге сәйкес, «Жақсылық жаса» атты еріктілер акциясының ашылу салтанаты болып өтті. Акцияның ашылуына Семей қалалық ішкі саясат бөлімінің басшысы Айдар Садырбаев, ШҚО Кәсіпкерлер палатасы Семей қалалық филиалының директоры Ардақ Әділжанов, үкіметтік емес ұйымдардың өкілдері, жоғарғы оқу орындары мен колледж студенттері қатысты.
Акцияны өткізуге «Исток» қоғамдық ұйымы, БҰҰ Даму бағдарламасының ШҚО-дағы өкілдігі, қалалық ЖИТС орталығы, орталық мәдениет және демалыс саябағымен қатар, жоғары оқу орындары және колледждердің ішінен құрылған еріктілер ұйымдары мұрындық болыпты. Акцияны ұйымдастырудағы негізгі мақсат – еріктілердің жұмысына қоғамның назарын аударту, көмекке мұқтаж жандарға қол ұшын беру арқылы шаһардағы еріктілердің белсенділігін арттыру. Акция барысында ерікті студенттер жиналған жұртшылыққа салауатты өмір салтын насихаттайтын шағын кітапшалар таратып, концерттік бағдарламаларын ұсынды.
– Бүгінде қаламыз бойынша Семей қаласының Шәкәрім атындағы мемлекеттік университеті, Семей мемлекеттік медициналық университеті, М.Әуезов атындағы педагогикалық колледж, Д.Қалматаев атындағы медициналық колледж, Радиотехника және байланыс колледжі және Көлік колледжінің жанынан жасақталған еріктілер клубтары белсенді жұмыс істеп келеді. Акция барысында бірқатар шараларды жүзеге асыруды көздеп отырмыз. Мәселен, онкологиялық сырқаттарға шалдыққан балаларға қаржылай көмек көрсетудің жолдарын қарастыратын боламыз. Қазіргі уақытта біздің ұйымда 60-қа тарта ерікті тіркелген. Өзге қоғамдық бірлестіктерде де еріктілер жасақтары бар. Шыны керек, өзге өңірлермен салыстырғанда біздің қаламызда еріктілердің белсенділігі баяу. Сондықтан да осы қолға алынған акцияның аясында біз еріктілер қатарына жастарды көптеп тартпақ ойымыз бар,- дейді «Исток» қоғамдық ұйымы директорының орынбасары Александра Шуленина.
Ал көпшілік алдында сөз алған қалалық ішкі саясат бөлімінің басшысы Айдар Садырбаев акцияның басталуымен құттықтай келе, осы шара нәтижесінде көмекке мұқтаж жандардың біршама мәселелері оң шешімін табатынына сеніммен қарайтынын жеткізді.
– Бұл игілікті істің соңы жемісті жеңіс-терге толы болады деген ойдамыз. Қаламызда жан жылуына зәру азаматтардың бар екені белгілі. Сіздердің осы амал-ниеттеріңіздің оларды қоғамға бейімдеуге септігін тигізетіні даусыз. Барлық еріктілерге атқарушы билік атынан алғысымды білдіремін. Жұмыстарыңызға табыстар тілеймін. Еліміздің өркендеуіне әрқашан да бірге атсалысайық,- деген лебізін жеткізді Айдар Серікқазыұлы.
Жақсылық СҮЛЕЙМЕН, «Семей таңы»
