Жуырда аудан орталығы Үржар ауылында ерекше жаңалық орын алды. Олай дейтініміз — көптен күттірген жаңа нысан- сәні келіскен «Ханшайым» салтанат сарайының ашылу рәсімі болып өтті.
«Атадан жақсы ұл туса, жеткізеді мұратқа» дейді халық нақылы. Саналы ғұмырын Үржардың болашағы үшін сарп еткен Зейнолла ақсақал мен Уазипа әжейдің перзенттерінің бірі, тұлпардың тұяғы, асылдың сынығы болған Асылбековтер әулетінен шыққан Дулат Зейноллаұлы «Туған жерге тағзым» акциясы аясында Үржардың тарихында бұрын-соңды болмаған зәулім сарайды халық игілігіне тарту етті.
Осы салтанатты сарайдың ашылуына орай, аудан тұрғындары мен қонақтарының қуанышымен бөлісуге аудан әкімі Серік Зайнулдин арнайы қатысты. Аудан тұрғындарын осынау әсем ғимараттың ашылуымен құттықтаған өңір басшысы өз сөзінде:
— Облыс әкімі Даниал Кенжетайұлы Ахметов «Туған жерге тағзым» акциясы бойынша бизнесмендерді, сол өңірден шыққан елжанды азаматтарды елге тартып, инвестиция құйып, халықтың игілігіне өздерінің қаржыларын салуға тапсырмалар берген-ді. Бүгін, міне, соның нәтижесіне куә болып отырмыз. Дулат Зейноллаұлы өзінің туған елі, кіндік қаны тамған жері Үржар ауданына үлкен инвестиция тартып жатыр. Осынау азаматқа үржарлықтар атынан алғысымды айтамын. Бүгінде, өз кәсіптері Алматыда болса да, елі мен жеріне келіп, Алакөлдің жағасынан «Арасан-Алакөл» атты үлкен демалыс орнын салып, халыққа пайдалануға бергеніне де екі-үш жыл ғана уақыт болды. Сол жерді әлі де дамытып жатыр. Туған еліне деген сүйіспеншілігінің арқасында мынадай зәулім сарай салу да үлкен жетістік. Мұндай ғимарат тіпті біздің облысымызда жоқ. Үржар өңірінде осындай жоғары дәрежедегі салтанат сараййының ашылуы — үлкен жаңалық. Алдағы уақытта да ауданымызға келіп, кәсібін дамытамын деген азаматтарға әрдайым қолдау көрсетуге әзірміз. Салтанат сарайы иесіне құтты болсын айтып, кәсібіне жеміс тілеймін,– деді Серік Зинабекұлы.
Аудан әкімі «Ханшайым» салтанат сарайының иесі, кәсіпкер Дулат Асылбековке өзінің құттықтау хаты мен сыйлығын табыс етті. Одан әрі Қасымсейіт Мақажанов ақсақал сөз алып, көпшілік алдында ақ батасын берді. Үржар аудандық өлкетану мұражайының директоры, ақын Серікбек Туғанов өзінің арнау өлеңін оқыса, Үржар ауылдық округінің әкімі Сайлауғазы Шарықпаев «Үлгілі мекеме» сертификатын табыс етті.
Лента қию рәсімі ауданның сыйлы ақсақалдары Нұрланбек Сандыбаев пен Қабдрашит Игенбаевқа және Қанағат Мұқанов пен Қасымсейіт Мақажановтарға берілді. Салтанатты рәсімнен соң жиналған қонақтар салтанат сарайын аралап көруге мүмкіндік алды.
З. НҰРЖАНҚЫЗЫ, Үржар ауданы.
