Семей қаласының әкімі Ермак Сәлімов футболдан ҚР—ның бірінші лигасында шығыстың намысын қорғап жүрген «Алтай» командасымен кездесті. Айта кету керек, Өскемен қаласының «Восток» және Семейдің «Спартак» командалары біріктіріліп, биылдан бастап «Алтай» командасы ШҚО – ның намысын қорғауда.
Қала әкімімен кездесуге «Алтай» ФК-ның бас директоры Сержан Шайжүнісов бастаған команда ойыншылары толық құрамда келді. Ең алдымен клуб жетекшісі қала әкімін команданың ұжымымен жақынырақ таныстырды. Белгілі болғандай, алтайлықтарды кезінде Қазақстан ұлттық құрамасының сапында қорғаушы міндетін атқарған Сергей Тимофеев жаттықтырады екен. Ал команда капитаны болып еліміздің әйгілі ойыншыларының бірі Андрей Карпович тағайындалыпты.
— Ойыншылардың алдында қарызымыз жоқ. Бүгінде команда турнир кестесінде 4-ші орында. Алдағы уақытта Премьер-лигаға шығу үшін бар күшімізді саламыз. Аймақ басшысы Даниал Ахметовке алғысымыз зор. Семей қаласы әкімдігінің де қолдауын сезіп отырмыз. Біздегі аяқдоп шеберлері қаржылай пайдадан гөрі, аймақтың намысын лайықты қорғауды бірінші кезекке қойып отыр,- деді С.Шайжүнісов.
Ал команда капитаны Андрей Карпович ойыншылар өздеріне артылған үмітті ақтау үшін жасыл алаңда аянып қалмайтынын жеткізіп, қала басшысына команданың жейдесі мен футболшылардың қолтаңбасы жазылған допты сыйға тартты. Өз кезегінде Ермак Бидахметұлы футбол ойыны Семей үшін әрқашан да айрықша маңызға ие екенін атап өтіп, алдағы кездесулерде сәттілік тіледі.
— Семей Қазақстан футболының отаны екені белгілі. Аяқдоппен айналысатын жастардың саны күн санап артып келеді. Сіздердің Өскемендегі алғашқы кездесулеріңізге қаламыздан қалың жанкүйерлер легі аттанған болатын. Бүгінде волейбол спортынан өнер көрсетіп жүрген «Алтай» клубы шығысқазақстандықтарды өздерінің жарқын жеңістерімен қуантып келеді. Бұл ретте біз сіздерден де осындай жеңістер күтеміз. Облыс әкімі Даниал Кенжетайұлы сіздердің алдарыңызға биік мақсаттар қойып отырғанынан жақсы хабардармыз және облыс басшысының қолдауымен аймақ футболының екінші демі ашылып отыр десем, қателеспеймін,- деді қала әкімі өз сөзінде.
Айта кету керек, «Алтай» ФК-ның құрамында 12 семейлік футболшы бар. Турнир кестесіне сәйкес, алдағы кездесу «Екібастұз» командасымен өтеді.
Жақсылық МҰРАТҚАЛИҰЛЫ, «Семей таңы»
