Өткен жылы Жапония Үкіметінің «Шөп тамыры» атты әлеуметтік жобаларды қаржылық қолдау бағдарламасы аясында қаладағы №29 орта мектепте тозығы жеткен ескі терезелерді жаңасына ауыстыру жұмыстары қолға алынған болатын. Міне, араға бір жыл салғаннан кейін, қажетті жөндеу жұмыстары соңына жетіп, білім ордасына заманауи пластикалық терезелер орнатылды. Осыған байланысты аптаның сәрсенбісінде аталмыш мектепте арнайы іс-шара ұйымдастырылды. Оған Жапон мемлекетінің Қазақстандағы Төтенше және Өкілетті елшісі Итиро Кавабата және Семей қаласы әкімінің орынбасары Надежда Шарова арнайы қатысты.
Күншығыс елінің «Шөп тамыры» бағдарламасы аясында Қазақстанда көптеген игі істер атқарылуда. Мәселен, 1997 жылдан бері аталмыш бағдарлама бойынша елімізде түрлі саланы қамтитын 80-ге тарта жоба іске асыпты. Оның 12 жобасы Семейде сәтті орындалған екен. Солардың бірі осы №29 орта мектептің ескі терезелерін жаңасына ауыстыру еді. Бүгінде білім шаңырағы жапондықтардың қолдауымен пластикалық үлгідегі заман талабына сай терезелерге ие болып, мектептің көркі ажарлана түскен.
— «Шөп тамыры» — адамзат қауіпсіздігін қамтамасыз ету мақсатын көздейтін шағын көлемдегі қайтарымсыз әлеуметтік бағдарлама. Ол халықтың әлеуметтік-экономикалық дамуына тікелей ықпал ететін жобаларды қолдауға бағытталған. Осы жоба арқылы Семейдегі жалпы орта білім беру мекемесінің терезелеріне күрделі жөндеу жұмыстары жүргізілді. Мектеп ұжымы қысқы маусымда оқу барысын жылы кабинеттерде өткізгендерін жеткізді. Бұл — біз үшін қуантарлық жаңалық. Өскелең ұрпақтың білім алуына ешқандай кедергілер туындамауы тиіс. Қымбатты оқушылар! Енді сіздер сабақтарыңызды жақсы оқып, келешекте өз елдеріңіздің абыройын арттыруға бар күштеріңіз бен білімдеріңізді жұмсауларыңыз қажет,- деп жылы лебізін арнаған Жапон елінің елшісі Итиро Кавабата мектеп оқушыларына күншығыс елі жайлы сыр шертетін арнайы бірнеше журналды сыйға тартты.
Өз кезегінде жергілікті атқарушы биліктің атынан сөз алған қала әкімінің орынбасары Н.Шарова қос мемлекет арасындағы байланыстың тамыры тереңде жатқанын тілге тиек етіп, осы бағыттағы әріптестік ынтымақтастық әлі де өз жалғасын табатынын жеткізді.
— Еліміздің рухани астанасы болып саналатын қасиетті Семей жеріне қош келдіңіз! Еліміз Тәуелсіздік алғаннан бері Жапон мемлекетімен жақсы қарым-қатынас орнатып, түрлі бағытта бірлесе жұмыс істеп келеді. Біздің қаламыз бен күншығыс елін тарихымыздың ақтаңдақ кезеңдері де байланыстыратыны белгілі. Ол — ядролық қаруға қатысты бірқатар мәселелер. Бұл ретте сіздердің жылдар бойы жинақтаған тәжірибелеріңіз бен озық жобаларыңыз өңіріміздегі бірқатар әлеуметтік сұрақтарды шешуге оң ықпалын тигізуде. Сол себепті сіздерге үлкен ризашылығымызды білдіреміз,- деді қала әкімінің орынбасары.
Шара барысында мәртебелі меймандар қос елдің достық ынтымақтастығын бекіте түсу үшін арнайы ағаш көшеттерін отырғызды. Сондай-ақ мектеп оқушылары шетелдік қонақтарға өздерінің шығармашылық өнерлерін көрсетті.
Жақсылық СҮЛЕЙМЕН, «Семей таңы»
