ШҚО–ның әкімі Даниал Ахметов өткен жылы жөндеуден өткен облыстық және республикалық маңызы бар жолдарды тексеруді тапсырды. Бұл ретте Өскемен – Риддер тас жолы да алдыңғы кезекте тексеруден өтеді.
Кепілді міндеттеме негізінде облыстың жолдарын жөндеген мердігер мекемелер қысқы және көктемгі уақыттан кейін жолдардың жағдайын тексереді. Аталмыш тапсырманы Даниал Ахметов кеңейтілген аппарат кеңесі барысында жауапты басқарма басшыларына жүктеді.
— Былтыр Өскемен-Риддер тас жолына орташа жөндеу жұмыстары бойынша ауқымды істер атқарылды. Барлық мердігерлер жолдың қазіргі жағдайын тексерсін. Өйткені еріген және жер асты суларын өткізу бойынша жөндеу жұмысы толық тексерілмеген,- деді Даниал Ахметов. Аймақ басшысының қатаң бақылауында орташа жөндеу жұмыстары жүргізілген жолдар тұр. Облыстың кейбір аудандарында жөндеу жұмыстары тәртіпке сәйкес жүргізілмейді. Мәселен, Өскемен — Бобровка, Өскемен — Самар тас жолдарында олқылықтар тіркелген.
Сонымен қатар Даниал Кенжетайұлы облыстағы қалалар мен аудандарды абаттандыру бойынша жұмысты жандандыруға тапсырма берді. Қалалық жолдардағы жөндеу жұмыстарын 1 маусымға дейін, ал облыстық тас жолдардағы жұмыстарды 1 шілдеге дейін аяқтауды тапсырды.
ШҚО Ақпараттық орталығы.
