Алашорда үкіметінің құрылғанына 100 жыл толуы қарсаңында Абай атындағы әмбебап кітапхана «Алаш» электронды кітапханасын жасап шығарды. Тұсаукесерге алаштанушылар, зиялы қауым өкілдері, тарихшы ғалымдар мен ЖОО, колледждер мен мектептердің тарих, әдебиет пәнінің ұстаздары және студенттер қатысты.
«Алаш» (http://alash.semeylib.kz) деп аталатын электронды кітапханада Алаш қайраткерлерінің мұраларына қатысты барлық мәліметтердің қазақ және орыс тілдеріндегі сандық нұсқасы берілген. Алаш қайраткерлерінің шығармашылығы туралы деректер қоры еліміздегі және шетелдердегі кітапханалар мен архивтерден, музейлер мен жеке авторлардың қорынан топтастырылып жинақталған. Еліміздегі республикалық және облыстық кітапханалар мен мұражайлардан, сондай-ақ Бішкек, Қазан қалаларындағы мемлекеттік архивтер қорынан алынған деректер құндылығымен ерекшеленеді.
— Мемлекет басшысы өзінің биылғы Жолдауында цифрлық индустрияны дамыту қажеттігін айтып, Үкіметке «Цифрлық Қазақстан» жеке бағдарламасын әзірлеуді тапсырған болатын. Халықаралық тәжірибе көрсеткендей, соңғы жылдары кітапхана саласын ақпараттандыруға, мәдени мұраны цифрландыруға және оған қолжетімділікті арттыруға баса назар аударылуда. Біз, Абай атындағы әмбебап кітапхана, еліміздегі мемлекеттік бағдарламаны дамытуға атсалысу мақсатында Алашорданың 100 жылдығы қарсаңында Алаш қайраткерлерінің рухына тағзым ретінде халық игілігіне жарарлық «Алаш» электрондық кітапханасы жобасын жасадық. Жобаны жүзеге асыруға ҚР Ұлттық академиялық кітапханасы, ҚР Ұлттық кітапханасы, облыстық кітапханалар мен мұражайлар, мұрағаттар, Бішкек және Қазан қалаларындағы мемлекеттік архивтер қолдау көрсетті. Барлығы 10 кітапхана, оның ішінде 3 жоғары оқу орнының кітапханалары, 17 мұражай, 8 мұрағат осы жобаны іске асыруға серіктес болды,- дейді Абай атындағы әмбебап кітапханасы директорының орынбасары Гүлмира Аязбаева.
Интернет пайдаланушыларының назарына ұсынылып отырған электронды кітапхана қорының басым көпшілігін әдебиеттер мен мерзімді басылымдардың көшірмелері құрайды. Алаш қайраткерлері туралы барлығы отыз төрт құнды құжаттар әзірленген. Электронды кітапхана жобасын жүзеге асыру барысында әуелі кітапхананың сирек қорында сақталып келген, Алаш қайраткерлерінің көзі тірісінде Мәскеуде, Орынборда, Қызылордада жарық көрген мұралары мен Орыс географиялық қоғамының Семей бөлімшесінің жазбаларында жарық көрген мақалаларының тізімі жасалған. Еліміз тәуелсіздік алғаннан кейінгі жылдары жарияланған еңбектері мен бүгінгі алаштанушы ғалымдардың зерттеулері де назардан тыс қалған жоқ. Кітапхана ұжымы тізімде жоқ кітаптар мен материалдарға еліміздегі және шетелдегі бірқатар кітапханалар мен мұражайларға, мұрағаттарға хат жолдау арқылы қол жеткізген. Нәтижесінде еліміздің 10 кітапханасынан 83 кітап пен мерзімді басылым беттерінде жарық көрген мақалалар, 18 мұражайдан 196 түрлі құжат пен басылымдардың көшірмесі, 6 мұрағаттан 66 құжаттың көшірмесі алынып, Қырғызстан, Татарстан Республикаларындағы мемлекеттік архивтер де Алаш қайраткерлеріне байланысты құжаттар мен кітаптарды ұсынған.
Шара барысында қала әкімінің орынбасары Надежда Шарова, М.Қозыбаев атындағы тарих және саяси-әлеуметтік зерттеулер ғылыми орталығының директоры, тарих ғылымдарының кандидаты, профессор Мұхтарбек Кәрімов, «Алаштану» ғылыми-зерттеу орталығының директоры Тұрдықұл Шаңбай, тарихшы-журналист, алаштанушы Мұратбек Кенемолдиндер өз ойларын ортаға салды. Сондай-ақ «Дариға-ай» жастар театрының әртістері «Алаш» тақырыбына арналған сахналық қойылым қойды. Жиын соңында кітапхана қызметкерлері электронды кітапхананы пайдалану тәртібін түсіндіріп, бөлімдерімен жан-жақты таныстырды.
Жадыра ТӨЛЕГЕНҚЫЗЫ, «Семей таңы»
