ЖЕЛІ ТОЛҒАН ЖЕЛ СӨЗ …
Дәл қазір әлеуметтік желінің айдарынан жел есіп-ақ тұр. Жаңа күнін балабақшаға апаратын баласын күттіріп қойып, желідегі жұрттың амандығын білуден бастайтын келін де, көлік тізгінінде отырып, жаһандағы жаңалықтарды білмесе, өзін қояр жер таппайтын жігіт те бұл күндері ешкімді таңқалдырмайтын болды. Ата мен әжелердің немерелеріне ертегі айтып беруге уақыттары жоқ… Өйткені қалт етіп қолы босай қалса, телефонға телміреді. Телефонды «жастанған» күйі кірпік ілінеді.
Ал ғаламтор жел сөздің ұясына айналып кетті…
Өткен аптаның соңында әлеуметтік желіде «Семейде мұғалімдер сабақты тастап сенбілікке шыққан» деген тақырыппен республикалық басылымдардың бірінде жарық көрген мақала жарқ ете қалғаны сол екен, желі қолданушылары үлкен қылмыс жасалғандай бірімен-бірі бөлісіп, Білім және ғылым министірінің мұғалімдерді басқа жұмысқа пайдалануға тыйым салғанын айтып, жаңалық ашқандай жамырасты.
Елімізде соңғы жылдары мұғалімдерге ерекше қамқорлық жасалып жатқаны рас. Бірақ әр нәрсеге парасаттылықпен қараған жөн емес пе? Мұғалім де осы қаланың тұрғыны. Қала – біздің ортақ үйіміз. Ендеше, өз үйімізді тазалау үшін министрден немесе әкімнен рұқсат сұрау, немесе тыйым салу қажет пе? Ұстаздар қауымы өз қаласының тазалығы үшін көктемде бір мәрте, күзде бір мәрте қолдарына сыпыртқы ұстаса, ештеңелері кетпейді деп ойлаймын. Сенбіліктің сенбі күні өткенін өзіміз де көрдік. Бұл күні мектептерде сабақ жоқ.
Атын шығару жолында жер өртеуге дайын болып жүрген біздің кейбір бауырларымыз басқа тақырып таппаған сыңайлы. Біле білсек, туған қаламызға деген құрметтің бір түрі осы емес пе ? Оқушыларға отансүйгіштік жайлы тағылым-тәрбие беретін ұстаздардың бір сенбілікке шыққандарын сөз қылулары әбестік деп білемін. Біле білгенге мұғалімдер осындай игілікті істе өздері бастама көтерулері керек деп ойлаймын. Оқушылар ұстаздарына қарап бой түзейді, ой түзейді. Сондықтан жастарға үлгі болатын дұрыс істі даудың тақырыбына айналдырмай, керісінше, қала тазалығы баршаға ортақ екенін оқушылар мен олардың ата-аналарына айтып, осы істе қолдау көрсету жарасса керек.
Ұсақ-түйекті термелеп, түймедейді түйедей дауға айналдыру мұғалім мәртебесін көтермейтіні анық.
РИЗА АСАНҚЫЗЫ
