АЛАШОРДА АЗАМАТТАРЫН АҚТАУ ЖАЛҒАСУДА
2021 жылы 24 қарашада Мемлекет басшысы Қасым-Жомарт Тоқаев «Саяси қуғын-сүргін құрбандарын толық ақтау жөніндегі мемлекеттік комиссия туралы» Жарлыққа қол қойған болатын.
Президенттің осы Жарлығы аясында әр өңірде жұмыс топтары құрылған болатын. Біздің облысымыз бойынша құрылған топтар іздестіру жұмыстары барысында бұрын ақталмаған бірқатар репрессия құрбандарын анықтап, тізімдерін мемлекеттік комиссияға жолдады.
Саяси қуғын-сүргін құрбандарын ақтау жұмыстары биыл да жалғасын тауып, жарияланбаған тың деректер іздестірілуде. Семей Алаштың отаны, Алашорда үкіметі құрылып, қызметін бастаған қасиетті мекені. Еліміз тәуелсіздік алған соң, ұлт зиялыларын ақтау мақсатында арнайы бағдарламалар жасалынып, осыған орай көптеген жұмыстар жүргізілді. Осы шаралар барысында ұлтының тағдыры үшін жанын қиған бірқатар қайраткерлердің ақталғаны белгілі.
Десек те, Алаш азаттығы жолында күрескен есімдері белгісіз тұлғалар да аз емес. Бұл сөзімізге Қазіргі заман тарихын құжаттандыру орталығы қорында сақталған құжаттар дәлел бола алады. Осы ретте Ұлттық қауіпсіздік комитеті, Ішкі істер департаменті архивтерінде сақталған құжаттарды зерттеп-зерделеу жұмысы ұйымдастырылды. Архив құжаттарын қарау барысында бұрынғы Шыңғыстау, қазіргі Абай ауданы бойынша «алашордашыл» деп жазылған ұлт мүддесі жолында еңбек еткен бірқатар азаматтардың есімдерін кездестірдік. Бұл азаматтардың бірқатары ақталған, қалғандары ақталғандардың тізімінде кездеспеді. Ендігі ойымыз – осы Алаш жолында жазықсыз жапа шеккен азаматтардың ұрпақтарын немесе туған-туыстарын іздеп табу, қазіргі күні осы бағытта жұмыстар жүргізіп жатырмыз. Мақсатымыз – көзі тірі қариялардан қуғын-сүргінге ұшыраған ата-бабаларының өмірлері жайлы сұрастырып, естеліктерін бейнетаспаға жазып алып, мұрағатқа өткізу.
Десек те осы зерттеуге қарапайым тұрғындардың көмегі де керек. Осы орайда, саяси қуғын-сүргін құрбаны болған бұрын ақталмаған азаматтардың туған-туыстары болса, Қазіргі заман тарихын құжаттандыру орталығына хабарласуларын өтінеміз, қолдарында бар кез келген мәлімет, фотосуреттер құнды екенін естеріңізге саламыз.
Лаура ҚАДЫРОВА,
Қазіргі заман тарихын құжаттандыру орталығының
ҒАА және құжаттарды пайдалану бөлімінің басшысы
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
