Қалада жаңа медресенің қазығы қағылды. Рухани білім ордасы Абай Құнанбайұлы мешітінің жанынан бой көтермек. Медресенің құрылысына жергілікті кәсіпкер азаматтар да демеушілік көрсетуге әзір.
«Ақшың» корпорациясының президенті, «Абыралы — Дегелең» қорының басшысы, меценат Марат Құрманбай діни нысанның бой көтеруіне жан-жақты қолдау көрсетуге дайын екенін жеткізді.
— Жаңадан құрылғалы отырған Абай облысының орталығы Семей қаласынан осындай медресе салу өте жақсы бастама деп есептеймін. Бұл бастаманың өскелең ұрпақтың бойына адамгершілік, имандылық, отансүйгіштік сынды ізгі қасиеттерді сіңіріп, рухани құндылықтарды дәріптеуде маңызы ерекше. Сондықтан барша азаматтарды, кәсіпкерлерді осынау игі іске атсалысуға шақырамын. Өз тарапымыздан барынша қолдау көрсетуге дайынбыз, — деді медресенің қазығын қағу рәсімінде сөз алған Марат Серікжанұлы.
Аталмыш шара барысында Марат Серікжанұлы және «JOLAMAN» көтерме-тарату орталығы ЖШС-нің директоры Мәди Маратұлы көпшілікпен бірге медресенің қазығын қағу рәсіміне қатысты.
Айта кетейік, жоба бойынша ғимарат үш қабаттан тұрады. Ұзындығы 42 метр, ені 18 метрді құрайды. Бір қабатында көпшіліктің сұранысына орай қатымхана орналаспақ. Жаңа нысан шаһардың ең сәулетті тұсында, орталық мешіттің жанында жергілікті кәсіпкерлердің және қала халқының атсалысуымен бой көтеретін болады.
Өз тілшіміз
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
