Семей қаласы әкімдігінің кеңейтілген аппараттық кеңесінде қалада сенбіліктер ұйымдастыру және өткізу мәселесі қаралды. Кеңесте тұрғын үй-коммуналдық шаруашылық бөлімінің басшысы Амантай Өтелбаевтың осы мәселе бойынша ақпараты тыңдалды.
Сәуір айының басында қабылданған Қаланы абаттандыру және санитарлық тәртіпті қалпына келтіру бойынша санитарлық-экологиялық екі айлықты (сенбіліктерді) өткізу туралы қаулыға сәйкес, сәуір айының 9, 16, 23, 30-ы және мамырдың 7, 14, 21, 28-і жалпықалалық сенбілік өткізу күндері болып белгіленген.
Тұрғын үй-коммуналдық шаруашылық бөлімінің басшысы Амантай Өтелбаевтың айтуынша, 300-ден астам әр түрлі меншік нысанындағы субъектілерге сенбілік өткізу туралы хабарламалар жіберілген.
Жалпы саны 80-нен астам билбордтары бар жарнамалық құрылымдардың иелеріне ескі айналымдағы баннерлерді тазалау және ауыстыру туралы хабарлама жолданған.
11 сәуірде арнайы комиссия өкілдері Т.Уранхаев, Б.Момышұлы, Қ.Мұхамедханов, Ә.Найманбаев, М.Дулатов, Ж.Ибраев, Ю.Гагарин және Құлжанов көшелерін аралап, тексеру жүргізді. Тексеру барысында іргелес аумақтары тазаланбаған кәсіпкерлік нысандар анықталып, тиісті шаралар қабылдау үшін Семей қаласының полиция басқармасына хат жолданған.
Жалпы алғанда, өткен сенбіліктерге 4500-ден астам адам қатысып, 2000 текше метрден астам қоқыс шығарылыпты.
Қала әкімі қала көшелеріндегі тазаланбаған қоқыс сөмкелеріне наразы болды.
— Мысалы, Шәкәрім атындағы университет барлық жиналған қоқысты автокөпірге апаратын жолдың жанына шығарған. Қанша күн болды, бұл қоқыс ешкімге керек жоқ, ешкім қоқысты тазаламаған. Неліктен университет қоқыс шығару бойынша келісім жасамады? Жауапты бөлімдерге бүгін кешке дейін барлығын тазалауды тапсырамын. Олай болмаған жағдайда, тұрғын үй-коммуналдық шаруашылық, жер қатынастары және автомобиль жолдары бөлімінің басшылары өз көліктерімен қоқыс салынған қаптарды тазалайтын болады, — деді Бақытжан Байахметов.
Шығыс кентіне апаратын негізгі жолдың бойында да осындай көрініс. Жолдың екі жақтары шашылған қоқыс. Осыған байланысты қала әкімі ІІБ басшылығынан учаскелік полиция қызметкерлерінің жұмысын күшейтуді талап етті.
— Учаскелік инспекторлар бұл қоқыстарды өз көздерімен көріп жүрсе де, ешқандай шара қабылдамайды. Бөлім мамандары учаскелік инспекторлармен бірге көшелерді аралауға күніне кем дегенде екі сағат уақыт бөліп, кәсіпкерлерге бизнестің әлеуметтік жауапкершілігі туралы түсіндірулері керек. Іргелес аумақты тазартумен айналыспайтын коммерциялық құрылымдарға нормативтік актілерде көзделген шараларды қабылдау қажет, — деді Бақытжан Байахметов.
Қала басшысы осы тапсырмаларға немқұрайлы қараған ТҮКШ, кәсіпкерлік, сәулет және жер қатынастары бөлімдерінің басшыларын сынға алды. Сонымен қатар қала әкімі, егер бір апта ішінде жағдай жақсармаса, тиісті шаралар қабылданатындығын ескертті.
Анар АХМЕТҚАЛИҚЫЗЫ,
«Семей таңы»