Елімізде заңғар жазушы, әдебиеттанушы ғалым, абайтану ғылымының негізін қалаушы Мұхтар Әуезовтің 125 жылдық мерейтойы бастау алды. Осы орайда қаламыздағы Әлихан Бөкейхан университетінде «Мұхтар Әуезовтің классикалық мұрасы әлем мәдениеті контексінде» атты республикалық ғылыми-тәжірибелік конференция өтті.
Конференция жұмысына Қазақстан Республикасының Мәдениет және спорт вице-министрі Нұрқиса Дәуешов, ҚР Парламенті Мәжілісінің депутаты Мақпал Тәжмағамбетова, ШҚО әкімдігі, М.О.Әуезов атындағы Әдебиет және өнер институты, Қазақстан Жазушылар одағы, «М.О.Әуезов үйі» ғылыми-мәдени орталығы, Абайдың «Жидебай – Бөрлі» мемлекеттік музей-қорығының қызметкерлері, әдебиеттанушы, алаштанушы ғалымдар, жоғары оқу орындарының профессор оқытушылары мен білім алушы докторанттары, магистранттар мен студенттер қатысты.
Конференцияның пленарлық отырысында жазушы, алаштанушы ғалым, профессор Тұрсын Жұртбай, ҚР ҰҒА академигі Ғарифолла Есім, ҚР ҰҒА корреспондент мүшесі, М.Әуезов атындағы Әдебиет және өнер институтының директоры Кенжехан Матыжанов, «М.О.Әуезов үйі» ғылыми-мәдени орталығының директоры, ф.ғ.к. Диар Қонаев, профессор, Шәкәрім университетінің «Абайтану және ұлттық руханият» ғылыми-зерттеу орталығының жетекшісі Арап Еспенбетов, «М.О.Әуезов үйі» ғылыми-мәдени орталығының бас ғылыми қызметкері, профессор Гүлзия Пірәлі сынды бірқатар ғалымдар Әуезов әлемі жайында баяндамалар жасады.
Конференцияда сөз алған ғалымдар Мұхтар Әуезов мұрасын әлемдік деңгейде тарату, жазушының шығармашылық, ғылыми әрі қоғамдық-саяси қызметін одан ары зерделеу, Әуезов мектебі мен Әуезов мұрасын сақтау, дамыту және насихаттау мәселелерін кеңінен қозғады. Алдағы уақытта конференция баяндамалары жинақ түрінде жарық көреді.
Ғылыми жиынның жұмысы сонымен қатар кеше, 27 сәуір күні, Мұхтар Әуезовтің туған жері Бөріліде жалғасын тапты.
Айта кетерлігі, жазушының мерейтойын атап өтудің республикалық жоспарына сәйкес, елімізде 4 бағытта 90-ға жуық іс-шара ұйымдастырылады. Ал облыс көлемінде 500-ден астам жоспардан тыс мерейтойлық шаралар өткізу жоспарланған.
Қ.ЖОЛЫМБЕТ,
«Семей таңы»
