Өткен аптаның соңында Халықаралық мұражайлар күніне орай Семей қаласының облыстық тарихи-өлкетану мұражайында «Музей түні» өткізілді. Биыл үшінші мәрте ұйымдастырылған мұражай түні қалалықтарға концерттік бағдарламалармен қатар, тарихымыздан сыр шертетін жәдігерлерді тамашалауға, түрлі сайыстарға қатысуға мүмкіндік сыйлады.
Биылғы мерекенің басты ерекшелігі — бағдарламадағы ән мен күй, би мен жыр, жұмбақтар мен жаңылтпаш, ұлттық ойындар Жылқы жылымен байланыстырылған. Мұражай директоры Бекен Теміровтің айтуынша, басты мақсат — халыққа рухани азық беру, тамырын тереңге тартқан тарихымыздан сыр шерту.
— Мұражай түні арқылы музейдің ішкі өмір тынысымен адамдарды таныстыруға тырысудамыз. Музей — мұрағаттар мен деректерді сақтаушы ғана емес, таратушы да болуы керек. Осы мақсатта ашық есік күнінде көрермендер барлық жәдігерлерді тегін тамашалайды,- дейді Б. Теміров.
Директордың пікірінше, қазіргі таңда халықтың рухани әлемі, мәдени деңгейі даму үстінде. Бір қуантарлығы, бірер жыл бұрын мектеп оқушылары мен студенттер мәжбүрлі түрде мұражайға келсе, қазір әрбір жанұя өз қалауларымен келіп, қызығушылық танытады екен.
Шараға қала әкімшілігі мен бөлім басшылары, мәдениет мекемелері мен ұжымдарының өкілдері, оқушылар мен студент жастар, қалалықтар шақырылды.
Семей қаласы әкімінің орынбасары Зәуреш Исабаева 131 жылдық тарихы бар тарихи-өлкетану мұражайы халыққа эстетикалық тәрбие, тарихи мағлұмат беруде орасан зор рөл атқарып келе жатқандығын жиналғандар алдында атап өтті.
{jcomments on}- Халықаралық мұражайлар күніне орай қолға алынған шара биыл да өз деңгейінде өткізілуде. Өнерге, әдебиет пен мәдениетке жақын жандарға рухани қазына сыйлап отырған аталмыш ұжымның жұмысына жеміс тілей отырып, қала әкімі Айбек Кәрімовтің атынан барлықтарыңызды мерекелеріңізбен құттықтаймын,- деп Зәуреш Рамазанқызы жылы лебізін білдірді.
Шаралар шымылдығын «Шығыс» әскери үрмелі оркестрі ашты. Мереке залдағы «Ер қанаты» атты көрмемен басталды. Қордағы ат әбзелдері мен қымыз құюға, сақтауға арналған ыдыс түрлері көрсетілді. Музей ауласында тігілген ақшаңқан киіз үйде «Қымызмұрындық» берілді. Қымызмұрындыққа қазыналы қарттар қатысып, сары қымыздан дәм татты. Сонымен қатар, мұражайдың тәуелсіздік залында «Қазақтар. Тарих және мәдениет» атты ХV-ХІХ ғасырлардағы қазақтың дәстүрлі қоғамының мәдениеті мен тұрмысын, сол кезеңдегі алуан түрлі иллюстрацияларымен кеңінен көрсететін жаңа кітаптың тұсаукесер рәсімі өткізілді. Музей қонақтары бұл кеште аулада ұйымдастырылған «Қолөнер құпиясы» көрме-жәрмеңкесін, шеберлік сабағын тамашалады. Сондай-ақ, «Төрт түліктің төресі», «Мың бір мақал», «Тай тұяқ», «Алтын таға», «Жүзден жүйрік» атты түрлі сайыстар өткізіліп, қонақтар түн жарымына дейін қызу сайысты тамашалады. Мұнда жастар үшін «Алтыбақан» құрылып, ойын-сауық отауы ұйымдастырылды. Мереке «Жұлдызды шашу» шарасымен сабақтасып, жүлдеге ие болған ойыншылар марапатталды.
Көрермендердің айтуынша, қызықты шараның тәрбиелік мәні зор. Мұражайдың ішкі тынысын тамашалуға насихаттауға бағытталған. Жастарды туған жерді сүйіп, құрметтеуге шақырады. Ел тарихынан сыр шертетін мәліметтерге қызығушылық тудырады. Көрермендер мұндай іс жал-ғасын тапса деген ниетпен тарқасты.
Әйгерім СӘРСЕНҒАЛИ,
«Семей таңы»
