AMANAT партиясының Семей қалалық филиалында қала әкімі Бақытжан Байахметов азаматтарды жеке сұрақтары бойынша қабылдады.
Қабылдауға келген қала тұрғыны — бала кезінен 3-топтағы мүгедек Өміржан Қуанышев бірнеше өтінішпен келіпті. Ол қол протезін алуға, тұрғын үй сатып алуға және жұмысқа орналасуға көмек көрсетуді сұрады. Отбасында екі бала бар, әйелі жұмыс істемейді.
Жаңа модульдік технология бойынша оң білек протезіне берілген өтініш қабылданған, кезектілік тәртібімен қамтамасыз етілетін болады. Деректер «Е-Собес» автоматтандырылған ақпараттық жүйесінен (ААЖ) Әлеуметтік қызметтер порталына берілетін болады.
Өміржан Қуанышевтың жұмысқа орналастыру туралы өтінішіне байланысты оған ШҚО Семей қаласы әкімдігінің халықты жұмыспен қамту орталығы «Gasмұнай» ЖШС, «Қазақстан» Республикалық Телерадиокорпорациясы» АҚ Семей филиалы және Шығыс Қазақстан Балет мектебінен жұмыс ұсынды. Бірақ ол бұл жұмыстардан бас тартты. Қазіргі таңда ол «Қазақцемент» ЖШС-де жұмыс істеп жүр, жалақысы 70 000 теңгеден асады. Өміржан Қуанышев мектепте әкімшілік шаруашылық бөлімінің меңгерушісі болып жұмысқа орналасқысы келеді. Алайда Enbek.kz базасында қала мектептерінде шаруашылық меңгерушісінің бос орны жоқ.
Ал тұрғын үй инспекциясы бөлімі тұрғын үйге кезекке қоюдан өтініш берушінің мүгедектік бойынша санаты расталмағанына байланысты бас тартты.
Қала әкімі білім бөлімі мен жұмыспен қамту және әлеуметтік бағдарламалар және азаматтық хал актілерін тіркеу бөліміне өтініш берушіні тұрғын үйге кезекке қою үшін бюджеттік ұйымға жұмысқа орналастыру мәселесін шешуге көмек көрсетуді тапсырды.
Бақытжан Байахметов қол протезін сатып алу мәселесі бойынша жұмыспен қамту және әлеуметтік бағдарламалар және азаматтық хал актілерін тіркеу бөліміне кепілдендірілген әлеуметтік пакет аясында көмек көрсетуді тапсырды.
Степной кентінің тұрғындары Гүлжан Магавьянова мен Қарлығаш Шюшанганова көп пәтерлі тұрғын үйлердің пәтерлері мен жертөлелеріне жылыту жүйесін жүргізуге қала бюджетінен қосымша қаражат бөлуді, сондай-ақ кент ішіндегі жолдар мен көшелерді жарықтандырып, жөндеу жұмыстарын жүргізуді сұрады.
ТҮКШ бөлімінің деректері бойынша, Степной кентінің 4 көшесінің жарықтандыру жүйелерін жаңғырту жоспарланған: жұмыстар Машинастроитель көшесі, Топографический көшесі, 1-Степной көшесі, 3-Степной көшесі келесі жылы жүргізілетін болады.
Степной кентіндегі № 51 тұрғын үйді орталық жылумен жабдықтауға қосуға қатысты ШҚО Семей қаласының құрылыс бөлімі «ШҚО Семей қаласының Степной кенті үшін жылу желісінің құрылысы» жобасы бойынша құрылыс жұмыстарын жүргізуге конкурс қорытындысына сәйкес шарттарға қол қою рәсімі жүргізіліп жатқанын хабарлады. Степной кентінің 18 объектісі жылумен жабдықтауға қосылған, оның ішінде 17 тұрғын үй және 300 орындық бір жалпы білім беретін мектеп бар. Мемлекеттік сараптамаға сәйкес, нысан құрылысы 8 айға созылады. № 51 тұрғын үй де тізімге кіреді. Магистралдық желінің құрылысы аяқталғаннан кейін үй тұрғындары орталық жылумен жабдықтауға өз бетінше қосылу мүмкіндігіне ие болады.
Ағымдағы жылы қаржыландыру жоспарында Степной кентіндегі жолды (негізгі трассаны) асфальттау бойынша жұмыстар қарастырылған. Сонымен қатар, қалған көлем жеткілікті болған жағдайда Степной кентінің көп қабатты үйлеріне кіреберіс жолдарды грейдерлеу жұмыстарын жүргізу жоспарлануда.
Қабылдау барысында ҚР Заңнамасы аясында түсініктеме берілді.
Қала әкімі ТҮКШ және құрылыс бөліміне пәтерлер мен жертөлелердегі жылу жүйесі мәселесін шешу жолдарын қарастыруды тапсырды. Сонымен қатар Бақытжан Байахметов жолаушылар көлігі және автомобиль жолдары бөліміне ағымдағы жылдың екінші жарты жылдығына арналған бюджетті түзету аясында Степной кенті ауданындағы көп қабатты үйлердің жолдарын жарықтандыру мәселелерін қарастыруды тапсырды. Тұрғын үй инспекциясы бөліміне кондоминимум мәселесін шешуге көмек көрсету тапсырылды. Қала әкімі кәсіпкерлік бөліміне Степной кентінің тұрғындары үшін дәріхана ашудың тиімділігі мәселесін зерттеп, зерделеуді тапсырды. Дәріхана ашуға арналған ғимарат бар.
Биылғы жылы Степной кенті ауданында балабақша ашу қарастырылмаған.Қаланың 2020-2025 жылдарға арналған кешенді жоспарға аталған мәселе енгізілетін болады.
Гүлнапис Нұрғалиева Суықбұлақ кентіндегі жолдар, № 48 орта мектеп (мектептен Суықбұлақ кентіне дейін) ауданындағы көшені жарықтандыру мәселесі бойынша өтініш білдірді.
Жолаушылар көлігі және автомобиль жолдары бөлімінің деректеріне сәйкес, ағымдағы жылы Суықбұлақ кентінде Чарский көшесін грейдерлеу бойынша жұмыстар көзделген. Жұмыстар ағымдағы жылдың 30 мамырына дейін орындалады.
«Семей қаласының көшені жарықтандыру жүйесін жаңғырту» жобасы аясында бұл аудан 2023 жылға арналған жұмыс жоспарына енгізілді. Қосымша бюджет қаражаты бөлінген жағдайда жұмыстар ағымдағы жылы орындалатын болады.
Жолаушылар көлігі және автомобиль жолдары бөліміне жолдарды жөндеу, Суықбұлақ ауданында көшені жарықтандыру, сондай-ақ ағымдағы жылдың екінші жарты жылдығына арналған бюджетті түзету шеңберінде осы ауданда қар ұстау мәселесін шешу тапсырылды.
Семей тұрғыны Айгүл Мұхамеджанова Кирпичный кентінде тұрады. 2022 жылдың ақпан айында оның үйінің қабырғасы құлаған. Тұрғын үйдің апатты жағдайы туралы «СтройЭксперт и К» ЖШС сараптамалық қорытындысы бар. Айгүл Мұхамеджанова жағдайды зерттеу үшін комиссия ұйымдастырып, көмек көрсетуді сұрады. Тұрғын мамыр айының 5-нен бастап «апаттық тұрғын үй» санаты бойынша кезекте тұр. Кезек нөмірі 32.
Қала әкімі ТҮКШ бөліміне демеушілер арқылы құрылыс материалдарын сатып алуға 50 газоблок пен 20 қап цемент (қабылдау барысында айтылған Айгүл Мұхамеджанованың өтініші бойынша) көмек көрсетуді тапсырды.
Тұрғын үй инспекциясы бөліміне авариялық үйдегі жөндеу жұмыстары аяқталғанға дейін жатақханада тұру мәселесін шешуге көмек көрсетуге тапсырма берілді.
Бақытжан Байахметов барлық бөлімдерге тапсырмалар бойынша атқарылған жұмыстар туралы жеті жұмыс күні ішінде ақпарат беруді тапсырды.
Ерлан АЙҚЫНҰЛЫ,
«Семей таңы»
