AMANAT партиясы Шығыс Қазақстан облыстық филиалының жанындағы өңірлік штаб мүшелері халық арасында конституциялық реформалар мен референдумның маңызын түсіндіру мақсатында жүйелі жұмыстар жүргізуде. Жақында өңірлік штаб мүшелері Марина Быкова мен Сергей Коротин бизнес-қоғамдастық өкілдерімен кездесті.
– Мемлекеттік модельді кешенді түрде өзгертуге мүмкіндік беретін конституциялық референдум – Әділетті Қазақстан ұстанымының бастамасы деуге де негіз бар. Ол биліктің өкілді тармағын (Парламент, мәслихат) айтарлықтай күшейтеді. Жаңартылған Заң аясында Президенттің барлық саяси күштер мен партиялардан дербестігін бекітуі – елдегі саяси партиялардың тең дәрежеде бәсекеге түсіп, демократиялық үдерісті үдете түсетіні сөзсіз. 5 маусым күні референдумға қатысып, болашақ үшін дауыс беруге шақырамын,- деді өңірлік партиялық штабтың мүшесі – Өскемен қалалық мәслихатының депутаты Сергей Коротин.
Мемлекет басшысы Қ.Тоқаев Конституцияға өзгертулер мен толықтырулар енгізу туралы өз Жарлығын жариялады. Саяси салмағы басым бұл бастама елімізде бастау алған саяси реформаларды жедел түрде іске асыруға бағытталып отыр.
– Біз елде демократия орнағанын қалаймыз. Билік қарапайым халықтың үнін естісе дейміз. Мемлекет басшысының шешімімен 5 маусымда жалпыхалықтық референдум өтеді. Сол күні осы саяси шараға қатысып, өз таңдауыңызды жасауға құқылысыз. Сіздің таңдауыңыз елдің болашағын айқындайды. Жаңа Қазақстан үшін дауыс беруге келіңіздер, – деді өңірлік партиялық штабтың мүшесі – ШҚО мәслихатының депутаты Марина Быкова.
Әлібек КЕМЕЛХАН,
«Семей таңы»
