Семей қаласында 4 маусымда Абай облысының құрылуына және республикалық референдумға, сондай-ақ «Елім-ай» футбол клубының қайта жаңғыруына арналған футбол фестивалі өтеді.
Фестиваль бағдарламасы бойынша балаларға шеберлік сыныптары, қайырымдылық кеші және семейлік футболдың шәкірті Андрей Карповичтің достарының кездесуі өтеді.
«Фестивальға қазақстандық және ресейлік футбол жұлдыздары келеді. Бұл өте қызықты және тартымды кездесу болады деп сенемін. Сонымен қатар кездесу семейлік футболдың шәкірті Андрей Карповичтің қоштасу ойынына арналған. «Елім-ай» командасы А.Карповичтің достарымен кездеседі. Бұл – «Елім-ай» футбол клубының қайта жаңғыруы. Семейде футбол болуы керек, себебі Семей – қазақстандық футболдың Отаны. Бұл жерде қаланың және жаңа облыстың намысын қорғайтын өз командасы болуы керек», – деді мерекені ұйымдастырушы Федор Симиниди.
Айта кету керек, балаларға арналған шеберлік сыныбы «Спартак» стадионында, «Турист» қонақ үйінің спорт алаңында, сонымен қатар «Абай Арена» спорт кешенінде өтеді. Футбол фестиваліне қазақстандық футболдың жұлдызы, даңқты жерлесіміз Самат Смақов қатысады деп күтілуде.
«4 маусымда «Спартак» стадионына келіңіздер. Өте қызықты болады. Біз өзіміздің «Елім-ай» клубын жаңғыртуымыз керек. Бұл – біздің мақтанышымыз, біздің тағдырымыз! Баршаңызды Абай облысының құрылуымен құттықтаймын!»– деді облыстық мәслихат депутаты Серік Байғалиев.
Еске салайық, футбол фестиваліне кіру тегін.
Ерлан АЙҚЫНҰЛЫ,
«Семей таңы»
