Облыс басшысы Даниал Ахметов Абай ауданына жұмыс сапарымен барып қайтты.
«Бүгін ұлы ақын, философ, ойшыл Абай Құнанбаевтың туған жері Абай ауданында болып, Кеңгірбай би ауылының тұрғындарымен кездестім»,- деп жазды аймақ басшысы инстаграм әлеуметтік желісіндегі жеке парақшасында.
Даниал Кенжетайұлының айтуынша, ауданда тұрғын құрылысы қарқынды дамып келе жатыр. Бір жыл бұрын кезекте тұрғандарға арналған көп пәтерлі үйлер қалпына келтірілді. Қарауыл ауылында Абайдың 175 жылдығына орай салынған саябақтың жанында «Бір қабатты Шығыс» бағдарламасы бойынша үйлердің құрылысы жүріп жатыр. Жақын арада мұнда тұтас шағын аудан болады.
«Ауданда туризмді дамыту үшін жақсы мүмкіндіктер бар. Біз ақын мен ағартушының есімімен байланысты маңызды жерлерге жаңа көрініс бердік. Абайтанушылар мен туристер тек Қазақстаннан ғана емес, басқа елдерден де осы қасиетті жерлерге барғысы келетініне сенімдімін. Сондай–ақ ауданда «Ауыл — Ел бесігі» бағдарламасы, абаттандыру, ауыз су бойынша жобалар табысты іске асырылып жатқанын атап өткім келеді»,- деп жазды аймақ басшысы.
Айта кету керек, Кеңгірбай би ауылында 2004 жылдан бері жөндеу көрмеген сумен жабдықтау жүйесін ағымдағы жөндеуге биыл облыс бюджетінен 30 млн теңге бөлініпті. Мердігер ұйым «Саланг-Құрылыс» ЖШС маусым айында барлық қажетті жөндеу жұмыстарын жүргізеді.
Аудан тұрғындарымен кездесу барысында Президенттің бастамаларына қолдау көрсету, 5 маусымда өтетін референдумның маңыздылығы, саяси шараға халықтың белсенді қатысуы қоғам өміріне қалай ықпал ететіні түсіндірілді.
Әлібек КЕМЕЛХАН,
«Семей таңы»
