Халықты әлеуметтік қорғау саласында балаларды қолдау үшін мемлекет тарапынан жан-жақты жағдай жасалып жатқаны белгілі. Біздің аймағымызда да көп балалы және аз қамтылған отбасылардан шыққан мектеп оқушыларына белсенді түрде қолдау көрсетіліп келеді. Биыл да балаларды қолдау шараларына ерекше назар аударылатын болады. Бұл туралы облыстық әкімдікте өткен жиында облыс басшысы Даниал Ахметов хабарлады.
Облыс әкімі Даниал Ахметовтің айтуынша, әсіресе білім алуда ерекше қажеттіліктері бар оқушыларға көбірек көңіл бөлінеді. Олар үшін қала және облыс мектептерінде барынша қолайлы жағдай жасалып жатыр.
— Ерекше қажеттіліктері бар балалар үшін инклюзивті білім беруге көп көңіл бөлінеді. Білім басқармасымен бірге бұл салада жүйелі түрде жұмыс жүргізудеміз. Көп балалы және аз қамтылған отбасыдан шыққан балаларды қолдауға да басымдылық беріледі. Осы жұмыстарға жалпы 3,5 миллиард тенге көлемінде қаржы бөлінді, — деді аймақ басшысы.
Сонымен қатар әкім облыстағы жалпы білім беру қоры 4%-ды құрайтынын айтты. Бұл еліміздегі ең жоғары көрсеткіштердің бірі екен.
Аймақта әлеуметтік салаға айрықша мән беріліп отыр. Былтыр облыстық деңгейде 238 бюджеттік бағдарлама жүзеге асырылса, оның 60 пайызы әлеуметтік салаға бағытталған.
— Оның көп бөлігі – 34 %-ы – бұл білім саласы. Білім жүйесінің жалпы бюджеті 211,8 миллиард теңгені құрайды. Ол дегеніміз — 644 мектеп, 357 мектепке дейінгі мекеме, 72 колледж және т.б. Осы салада елеулі жетістіктерді біз қазір анық көре аламыз. Мысалы, өткен жылы 33 мың компьютер сатылып алынды. Еліміздегі мектептерде 6 оқушыға 1 компьютерден келетін болса, бізде 3 оқушыға, облыстың кейбір аймақтарында тіпті 2 оқушыға 1 компьютерден келеді, — деді Даниал Ахметов.
Даниал Кенжетайұлы қазіргі таңда облысымызда апаттық жағдайдағы және үш ауысымдық мектептер жоқ екенін жеткізді.
ҚР Президентінің тапсырмасы бойынша, 2025 жылға дейін елімізде 1000 орта білім беру мекемелері салынады. Оның ішінде 33 мектеп біздің облыста бой көтереді. Биыл 7 мектеп салу жоспарланған. Облыс әкімінің айтуынша, Риддер қаласындағы 600 орындық және Ұлан ауданындағы 320 орындық мектеп құрылысы аса маңызды. Бұл екі мектептің де құрылыс жұмыстары межеленген уақытта аяқталады.
Аймақ басшысы айтып өткендей, Шығыс Қазақстанда білім және мектеп инфрақұрылымына қатысты мәселелерге үлкен көңіл бөлінеді. Оқушыларды білім ордаларымен қамту мәселесі бірте-бірте өз шешімін табуда. Бұл проблема Семейде өзекті болатын. Алайда, облыс әкімі Даниал Ахметовтің айтуынша, қазір ол толығымен шешілді.
— Өткен жылы Семейдегі Шығыс кентінде 1200 орындық, Степной кентінде 300 орындық мектеп cалынды. Қаладағы мектеп инфрақұрылымының артта қалуының концептуалды проблемасы қазір мүлдем жоқ, — деді аймақ басшысы.
Жалпы, былтыр білім нысандарының базасын нығайтуға 13,1 млрд теңге инвестиция салынған. 3-6 жас аралығындағы балаларды мектепке дейінгі мекемемен қамтамасыз ету мәселесі толықтай шешімін тапты. 2-6 жас аралығындағы балаларды мектепке дейінгі ұйымдармен қамтамасыз ету 8 пайызға өсіп, 97,2 пайызды құраған. Екі жыл ішінде көрсеткішті жүз пайызға жеткізу жоспарлануда.
Динара НҰРЛЫБЕКҚЫЗЫ,
«Семей таңы»
