Семей қаласының әкімі Бақытжан Байахметов 343-ші квартал тұрғындарымен кездесті.
Байсалықов, Челюскинцев және Дәстенов көшелерінің тұрғындары жолдардың нашарлығын айтып шағымданды. Бақытжан Байахметовтің айтуынша, биыл аталған көшелерде жол жөндеу жұмыстары қарастырылған. Өз кезегінде қала әкімі тұрғындарға жөндеу жұмыстарының барысы мен сапасын тексеретін бастамашыл топ құруды ұсынды.
Әкімге балалар спорт алаңдары мен демалыс саябағының жоқтығы да айтылды. Тұрғындардың айтуынша, №9 мектеп аумағында балалар алаңы мен демалыс саябағын салуға арналған үлкен учаске бар. Қала әкімі бөлімдерге осы мәселені зерделеуді тапсырды.
Кездесуге келген көп балалы отбасы қала басшысынан көмек сұрады. Отбасы тұрғын үй кезегінде тұр. Қазіргі уақытта үйді жалға алып тұрады, мемлекеттен 50% өтемақы ала алмай отыр, бұған үйдің иесін кінәлі деп санайды. Көп балалы әке сондай-ақ үйге су құбырын өткізуге көмек көрсетуді өтінді. Бақытжан Байахметов тұрғын үй мәселесі бойынша тұрғын үй инспекциясы бөліміне жүгіну қажеттігін түсіндірді. Ал су құбырын жүргізу мәселесі бойынша тиісті бөлімге тапсырма берді.
Тұрғындардың айтуынша, аталған ауданда футбол алаңы жарықтандырылмаған. Бақытжан Байахметов өзінің орынбасарына оқу орнының директорымен байланысып, осы мәселені шешуді тапсырды.
Аудан тұрғындары кеуіп қалған ағаштарды кесуді сұрады. Бұл мәселені шешу ТҮКШ бөліміне тапсырылды.
Ерлан АЙҚЫНҰЛЫ,
«Семей таңы»
