Апта ішінде Шығыс Қазақстан облысына қатысты мақсатты трансферттердің қаржылық статистикасы жарияланды. Оның ішінде Семей қаласына да қатысты тың мәліметтер бар.
Атап айтар болсақ, 2015 жылдан 2022 жылға дейінгі аралықта аймақ республикалық бюджеттен 390,3 млрд теңге қаражат алған. Оның 200 млрд теңге, немесе 51 пайыз үлесі Семей өңірін дамытуға бағытталған екен. Қалған 49 пайызы қалалар мен аудандарға бөлініпті.
Әлеуметтік желіде Семейдің белсенді тұрғындары қаладағы проблемалар мен оларды шешуге қаржы бөлінбегені туралы жиі жазады. Алайда қала тұрғындарының бұл субъективті пікірі статистикаға түбегейлі қайшы келеді.
Сонымен, мұндай үлкен сома қандай мақсаттарға жұмсалды?
Аймақтағы білім беру жүйесін дамытуға 21,4 млрд теңге бағытталды. Бұл қаражатқа бірқатар орта білім беретін мектептер мен дарынды балаларға арналған мектептер салынды, пәндік және робототехника кабинеттері жасақталды, ұйымдастыру техникасы мен оқу-әдістемелік материалдар сатылып алынды.
Денсаулық сақтау саласын дамытуға 31,9 млрд теңге бөлінді. Бұл ақша Қазақстандағы алғашқы Ядролық медицина және онкология орталығының құрылысына жұмсалды. Инсульттік және кардиологиялық орталықтарға жаңа құрал-жабдықтар алынды. Жедел медициналық жәрдем ауруханасының базасында гибридтік ота жасайтын зал ашылды. Жүрек-қан тамырларын емдеу, онкологиялық аурулар, перинаталдық қызмет бойынша маманданатын дәрігерлер Ұлыбритания, Израиль, Польша, Жапония және тағы да басқа елдердің жетекші емханаларында тағылымдамадан өтті.
Ал мәдениет және спорт саласына соңғы жылдары 39,3 млрд теңге инвестиция салынып отыр. Оның көп бөлігі Қарағайлы ықшам ауданындағы мәдени-спорттық кешеннің құрылысына жұмсалды.
Тұрғын үй құрылысына — 106,7 млрд теңге, сумен және жылумен қамтамасыз етуге — 75,7 млрд теңге, инженерлік-коммуникациялық инфрақұрылымға — 27,7 млрд теңге, жол жөндеу жұмыстарына 42,1 млрд теңге бөлінген. Бюджеттік қаражаттың тағы 4,8 млрд теңгесі аймақтық аумақтағы түрлі жобалар мен бағдарламаларға жұмсалған екен.
Айта кетсек, республикалық бюджеттен алынған трансферттер мен несиелерден бөлек, Семей жыл сайын әлеуметтік және инженерлік инфрақұрылымды дамытуға облыстық бюджеттен қосымша мақсатты трансферттер алып отырды. Бұл сома 2015 жылдан 2022 жылға дейінгі аралықта 153,9 млрд теңгені құрады.
ШҚО әкімдігінің баспасөз қызметі
