Өткен аптаның соңында Семей қаласының әкімі Бақытжан Байахметов шаһардағы Пржевальский көшесінің тұрғындарымен кездесті.
Бұл көшеде ірі түйіршікті асфальт бетонның төменгі қабатын салу жұмыстары жүргізіліп, қазіргі уақытта қиыршық тасты-мастикалық асфальт бетонның жоғарғы қабатын төсеу жұмыстары басталды. Ұзындығы 1 шақырым және ені 7 метр жол учаскесі асфальт бетон қабатымен жабылады (төменгі қабаттың биіктігі — 5 см, жоғарғы — 4 см).
Көшенің жолы №38 жалпы орта мектебіне апаратындықтан, оны абаттандыру оқушылардың қауіпсіздігіне оң әсер етеді.
Пржевальский көшесінің Белібаев көшесінен Гастелло көшесіне дейінгі бөлігінде орташа жөндеу жұмыстары аяқталды.
Кездесу барысында тұрғындар тарапынан қала әкіміне жол қауіпсіздігі, көшені жарықтандыру, қоғамдық көлік жұмысын жақсарту, аялдама павильондарын орнату және жылумен қамтамасыз ету мәселелеріне қатысты бірқатар өзекті сұрақтар қойылды, сондай-ақ тротуар жолдарын төсеу қажеттігі де айтылды.
Тұрғындар сонымен қатар жол белгілерін орнату, 1-ші Декабрь көшесіне қиыршық тас себу туралы өтініштерін де жеткізді.
Айта кетер болсақ, аталған аумақта асфальт соңғы рет өткен ғасырдың 90-шы жылдарында төселген болатын.
Қала басшысы Бақытжан Байахметов бөлімдер мен құрылымдық бөлімшелердің басшыларына тұрғындар көтерген мәселелердің мән-жайын егжей-тегжейлі зерттеп, оларды шешу жолдарын пысықтауды тапсырды.
Пржевальский көшесінде жүргізіліп жатқан жұмыстар маусым айының соңында аяқталады деп күтілуде.
Азамат ЕРСАЙЫН,
«Семей таңы»
