Қала әкімі Бақытжан Байахметовтің ауылдық округтер тұрғындарымен кездесулері жалғасуда. Бұл жолы шаһар басшысы Шақаман ауылында Достық ауылдық округінің тұрғындарымен кездесті. Кездесуде қала әкімі Семей қаласының, округтің әлеуметтік-экономикалық дамуы, атқарылған жұмыстар мен алдағы жоспарлар туралы баяндады.
Ауылдық округте — Достық және Шақаман кенттерінде бір жарым мыңнан астам адам тұрады.
Қала басшысының айтуынша, округті дамытуға 3 жылда 611,3 млн теңге бағытталған. Әкімдік ғимаратына ағымдағы жөндеу жұмыстары жүргізілді. Ауыл клубы жөнделіп, көше жарығы орнатылды. Қазіргі күні Шақаман ауылындағы су құбырына қайта жаңғырту жұмыстары жүргізілуде. Жұмыстар қыркүйек айының соңында аяқталады деп күтілуде.
Ахметов көшесін жарықтандыру үшін қаражат бөлінген. Қазіргі күні тұрғын үй-коммуналдық шаруашылық бөлімі конкурстық құжаттама дайындауда және жақын күндері конкурс жарияланбақ. Сондай-ақ шілде айында әкімдік ғимаратының шатырын жөндеу жұмыстары басталады. Сонымен қатар спорттық-ойын алаңын орнатуға келісімшарт жасалды.
— Округтің 2025 жылға дейінгі даму перспективасына 52,3 млн теңге бөлу жоспарлануда. Шақаман ауылында балалар ойын және футбол алаңы орнатылады. Сондай-ақ К.Ахметов көшесіне жарық орнату жоспарлануда, — деді қала әкімі.
Қала әкімі осыған дейінгі есеп беру кездесуінде округ тұрғындары көтерген мәселелер бойынша атқарылған жұмыстарға тоқталды. Олардың бірі жазғы демалыс кезінде мектеп жанындағы шағын орталықтың жұмысын ұйымдастыруға қатысты болатын. Білім бөлімінің мәліметінше, 1 маусымнан бастап мектеп жанындағы шағын орталық жұмыс істеуде. Ондағы үйірмелерге көп балалы отбасылардағы оқушылар қатыса алады.
Тұрғындар спорт секцияларын ұйымдастыру үшін мектеп ғимаратына бөлме бөлуді сұраған болатын. Бұл мәселе де өз шешімін тапты. Тұрғындар сонымен қатар мектеп спорт залына ересектердің кіре алмайтынын айтып шағымданған болатын. Енді мектеп жасындағы балалармен қатар, ауыл жастары үшін де спорт залының есігі ашық.
Тұрғындар сонымен қатар Шақаман ауылындағы мектептің 3-қабатының терезелерін ауыстыруды сұраған болатын. Әкім сол кездесуде бұл мәселені қарастыруға дайын екендігін жеткізген болатын, бірақ, өкінішке орай, облыстық білім басқармасына нақтылауға бюджеттік өтінім берген кезде қаражат бөлінбеген.
Тұрғындар Шақаман ауылындағы бейберекет төгілген қоқыс мәселесін де шешіп беруді өтінген болатын. Қазіргі уақытта бұл бағытта жұмыстар жүргізілуде, қоқысты шығаруға облыстық мәслихат депутаттарының бірі арнайы техникамен көмек көрсетуде.
Тұрғындар көтерген мәселелердің тағы бірі облыстық маңызы бар Семей – Курчатов тас жолынан Талды разъезіне дейінгі ұзындығы 7 шақырым жол учаскесіне орташа жөндеу жұмыстарын жүргізу болатын. Талды ауылына кіреберіс жолдарды ағымдағы жөндеуге 37 млн теңге қаржыға сметалық есеп бар. Алайда жол сапасы орталығы сараптамасының оң қорытындысы жоқ.
Тұрғындар Шақаман ауылының көшелерінде су құбырын жүргізу барысында пайда болған шұңқырларды топырақпен толтыру қажеттігін айтқан болатын. Алайда мердігер «QazConstructions» ЖШС бұл мәселені әлі күнге дейін шешкен жоқ. Бүгінгі кездесуге олардың өкілдері келмеді. Енді мекеме өкілдері мен жергілікті тұрғындардың қатысуымен кездесу өткізіп, түсіндіру жұмыстарын жүргізу керек.
Тұрғындардың айтуынша, округте мал дәрігері жетіспейді. Жиында бұл мәселе алдағы уақытта қарастырылатыны айтылды. Ауылдық округ әкімі тарапынан компьютерлік техникамен жабдықталып, интернет байланысына қосылған қызметтік кабинет бөлінді. Жаппай ветеринариялық-профилактикалық іс-шараларды өткізу кезінде Ертіс ауылдық округінің ветеринар мамандары тартылады. Сондықтан бұл мәселе бақылауда және қосымша қарауды талап етеді.
Сол сияқты Талды разъезін интернетпен қамтамасыз ету мәселесі де қосымша қарауды талап етеді. Осындай мәселелер барлық шағын елді мекендерге тән.
Қазақстан Республикасы цифрлық даму, инновациялар және аэроғарыш өнеркәсібі министрлігі ҚР Ұлттық экономика министрлігімен және облыс әкімдіктерімен бірлесіп, 2024 жылға дейін ұялы байланыспен және кең жолақты интернетке қолжетімділікті қамтамасыз ету үшін халқының саны 250 адамнан кем ауылдық елді мекендерге талдау жүргізуде.
Өткен кездесуде тұрғындар мектепте музыкалық аппаратураның жоқтығын айтқан болатын. Бұл мәселе де әлі шешілген жоқ. Әкім орынбасарына және білім бөліміне 1 млн 200 мың теңге көлемінде қаражат іздестіруді және бұл мәселені 1 ай ішінде шешуді тапсырды.
Кездесуде тұрғындар өрт сөндіру машиналарының жоқтығына алаңдаушылық білдірді. Мұндай мәселе басқа шалғай ауылдық округтерде де бар. Қала басшысы мәселені ішінара Алматыдан өрт сөндіру машиналарын жеткізу арқылы шешуге болатынын айтып, Алматыдан 7 өрт сөндіру машинасын беру туралы алдын ала келісім жасалғанын жеткізді.
Жиын соңында Бақытжан Байахметов Шақаман ауылының дәрігерлік амбулаториясының меңгерушісі Айнұр Антықбаеваны Медицина қызметкерлері мерекесіне орай алғыс хатпен марапаттады.
Кездесуден соң қала басшысы тұрғындарды жеке мәселелері бойынша қабылдады. Әкімнің қабылдауына келген көп балалы ана Ажар Анатольевна Шәкәрім атындағы агротехникалық колледжде ақылы негізде оқитын ұлының оқу ақысын 150 мың теңгеден 120 мың теңгеге дейін төмендетуге көмек көрсетуді сұрады. Көп балалы ананың бұл өтініші қанағаттандырылатын болды.
Әкімнің қабылдауына Жадыра Тәттімбетова есімді ауыл тұрғыны келді. Ол тұрғын үй алу үшін кезекке тұра алмай жүргенін айтып, көмек сұрады. Алайда оның атына тұрғын үй тіркелген. Өтініш иесіне аталған жағдайға байланысты тұрғын үйді электронды кезекке қосу туралы шешім қабылдау мүмкін емес екені түсіндірілді.
Келесі тұрғын — Мұрат Сүлейменов сүт фермасын ашқысы келетінін айтып, өзінің шаруа қожалығы үшін жер телімін бөлуді сұрады. Қала әкімі орынбасарына Мұрат Сүлейменовті Семей қаласында қабылдап, конкурстық рәсімдердің ережелерін түсіндіруді тапсырды.
Қала әкімінен 8 жасар ұлының медициналық тексеруден өтуіне көмек сұрап келген Айнұр Тәттімбетова есімді тұрғынның да өтініші орындалды.
Динара НҰРЛЫБЕКҚЫЗЫ,
«Семей таңы»
