Өткен аптада қала басшысы Бақытжан Байахметов Ертіс ауылдық округі тұрғындарымен де кездесті.
Қазіргі күні округтегі 9 елді мекенде екі жарым мыңнан астам адам тұрады.
Жиында айтылғандай, округті дамытуға 3 жылда 598,7 млн теңге бағытталған. Бұл қаражат Мұқыр ауылындағы су құбыры желілерін қайта құру жұмыстарына жоспарланған болатын. Сондай-ақ Мұрат ауылындағы су құбыры желілерінің құрылысына жобалық-сметалық құжат әзірленген. Түрксіб орта мектебіне ағымдағы жөндеу жұмыстары жүргізіліп (жылыту қазандықтары, ішкі дәретханалар жүйесі), қазандығының мұржасы ауыстырылды.
«Ауыл – Ел бесігі» бағдарламасы аясында Мұқыр ауылына кіреберіс жолды орташа жөндеуге келісімшарт жасалған. Құны 86,7 млн теңге болатын жобаны «ПрофАзияСтрой» ЖШС жеңіп алды. Жөндеу жұмыстары осы жылдың қараша айының соңына дейін аяқталады деп күтілуде. Сондай-ақ Мұрат ауылына кіреберіс жолды орташа жөндеуге де шарт жасалған.
Тұрғын үй — коммуналдық шаруашылық бөлімі Мұқыр, Прииртышский және Мұрат ауылдарына көше жарығын орнатуға жобалық-сметалық құжат әзірлеуде, конкурс жариялау жоспарланып отыр.
Ағымдағы жылы Прииртышский ауылында әмбебап спорт алаңы орнатылды. Тұрғындар спорттық турнир өткізіп, спорт алаңын салтанатты түрде ашуды жоспарлап отыр.
Сондай-ақ келесі жылы Мұрат ауылында су құбыры желілерінің құрылысын жүргізуге шарт жасалған. Жоспарланған қаражат көлемі — 129 млн теңге.
— Жалпы, 2025 жылға дейін «Ауыл – Ел бесігі» жобасы аясында Мұрат ауылында су құбыры желілерінің құрылысын жүргізуге, Мұқыр, Прииртышский және Мұрат ауылдарына көше жарығын орнатуға 294,6 млн теңге қаржы бөлу жоспарлануда,- деп атап өтті Бақытжан Байахметов.
Прииртышский ауылында балалар ойын алаңын орнату және демалыс саябағында сахна орнату жоспарланып отыр.
Өткен кездесуде жайылымдық жерлердің жетіспеушілігі мәселесі көтерілген болатын. Бұл мәселе оң шешімін тапты: Ертіс ауылдық округінде елді мекеннің 9 385 гектар жері бар, оның ішінде Мұқыр ауылында мал жаюға пайдаланылатын 4 895 гектар жер бар.
— Халықтың малын жайылымдық алқаптармен қамтамасыз ету бағдарламасы аясында Ертіс ауылдық округі әкімінің аппаратына Жиенәлі ауылдық округінде жайылымдарды ұйымдастыру үшін жалпы ауданы 5500 гектар жер берілді, — деді қала басшысы.
Сондай-ақ жер қатынастары бөлімі мен ауыл шаруашылығы бөлімі бірлесіп, сәуір айында Мұқыр ауылының тұрғындарымен жайылымдық жерлердің жетіспеушілігі мәселесін шешу мақсатында жиналыс өткізілген. Кездесу барысында тұрғындарға жер телімдерін беру тәртібі түсіндіріліп, картада мал жаюға арналған жерлер көрсетілді.
Мұқыр ауылында 0 — 6 жас аралығындағы 153 бала бар. 183 бала мектепте оқиды, оның 19-ы мектепалды даярлық сыныбында.
Түрксіб мектебінде 50 балаға арналған жарты күндік шағын орталықта 2 топ ашылған. Оған іс жүзінде 40-тан астам бала барады.
— Өткен кездесуде тұрғындар Мұқыр ауылында балабақша салу мәселесін қарастыруды сұраған болатын. Бүгінгі таңда біз балабақша салу үшін инвестор іздестіріп жатырмыз, — деп атап өтті қала басшысы Бақытжан Байахметов.
— Мұрат ауылында қатты тұрмыстық қалдықтар полигонын ашу бойынша ауыл әкімдігі техникалық шарттарды ала отырып, инвестициялық ұсыныс әзірлеп, экономикалық қорытынды алу үшін ұсынуы қажет, — деп түсіндірді қала әкімі.
Шаруа қожалығының басшысы Болат Жүсіпов жоңышқа егу және жем-шөп базасының мәселелерін шешу үшін пайдаланылмайтын 80 гектар жер учаскесін шаруашылыққа беруге көмектесуді сұраған болатын.
— Бұл мәселе қарастырылуда. Жер қатынастары бөлімі Ертіс ауылдық округінде орналасқан ауданы 80 гектар жер учаскесіне жерге орналастыру жобасын әзірлеуде. Жерге орналастыру жұмыстары аяқталғаннан кейін шаруа қожалығын жүргізу үшін жер учаскесін беру бойынша конкурс жарияланады, — деді Бақытжан Байахметов.
Прииртышский ауылының тұрғындары ауылды жоғары жылдамдықтағы интернетпен қамтамасыз ету туралы өтінішіне келсек, Прииртышский ауылында Beeline – 2G, Kcell – 2G ұялы байланысы, «Қазақтелеком» АҚ CDMA интернеті бар.
— Байланыс операторларының кең жолақты интернетке қосылу сапасын жақсарту жөніндегі міндеттемелеріне сәйкес, Kcell және Beeline компаниялары ауылды ұялы байланыс желілеріне шамамен 2023 жылы қосуды жоспарлап отыр, — деді қала басшысы.
Жергілікті халық сондай-ақ Прииртышский ауылындағы бос тұрған екі және үш қабатты ғимараттарды жөндеп, кейін аз қамтылған азаматтарға беру мәселесін қарастыруды сұраған болатын. Қазандығы бар (Молодежная көшесі, 19) бұрынғы 18 пәтерлі тұрғын үйдің үш қабатты ғимараты тұрғын үй инспекциясы бөлімінің теңгерімінде. Ғимарат 2000 жылы салынған, жалпы ауданы 1000 шаршы метрден астам. Ғимарат ескірген, есік-терезелері жоқ, қазандығы толығымен бұзылған.
Прииртышский ауылында 902 адам тұрады. Ертіс ауылдық округі бойынша тұрғын үй алуға кезекте «көп балалы отбасы» мәртебесі бар 4 адам тұр (Прииртышский ауылында 1 адам, Мұқыр ауылында 1 адам, Мұрат ауылында 2 адам).
— Осыған байланысты ғимаратты тұрмысы төмен азаматтарға беру үшін оған жөндеу жүргізу экономикалық тұрғыдан тиімсіз, — деп түсіндірді қала басшысы.
Ал екі қабатты ғимарат Ертіс бройлер фабрикасына тиесілі. Нысан аяқталмаған құрылыс санатына жатады, меншік иесі оны сату мәселесін қарастыруда (жеке тұлғадан балабақша ашу үшін осы нысанды сатып алу туралы ұсынысы түскен).
Бройлер фабрикасының меншік құқығындағы 1980 жылы салынған жалпы ауданы 409,2 шаршы метр болатын бір қабатты ғимараты да бар, оны меншік иесі әкімдікке өтеусіз беруге дайын.
Өз кезегінде ауылдық округ әкімі бұл ғимаратты тұрғындардың өтініші бойынша қатымхана ашу мақсатында бизнес субъектілеріне беру туралы ұсынысын жеткізді.
Кездесу соңында қала әкімі Бақытжан Байахметов Мұқыр ауылының жалпы практика дәрігері Қымбат Күйеубаева мен Ертіс ауылдық округінің жалпы тәжірибе дәрігері Талғат Дүйсінбековті кәсіби мерекелерімен құттықтап, алғыс хаттар табыс етті.
Анар АХМЕТҚАЛИҚЫЗЫ,
«Семей таңы»