Абай облысының әкімі Нұрлан Ұранхаевтың арнайы шақыруы бойынша Семей қаласына жұмыс сапарымен Қазақстан Республикасы Парламенті Мәжілісінің Экология мәселелері және табиғатты пайдалану, Экономикалық реформа және өңірлік даму мен Аграрлық мәселелер бойынша комитеттерінің өкілдері, сондай-ақ Ауыл шаруашылығы, Энергетика, Ұлттық экономика, Индустрия және инфрақұрылымдық даму, Экология, геология және табиғи ресурстар министрліктерінің сарапшылары келді.
Абай облысы орталығына елордадан арнайы келген делегация өңірдің өзекті мәселелерін егжей-тегжейлі зерттеп, қажетті ақпараттар жинайды. Елорданың орталық мемлекеттік органдарының өкілдері өткен жексенбіде қаладағы жылу беру нысандарын аралап шықты. ҚР Ұлттық экономика вице-министрі Бауыржан Омарбеков, ҚР Энергетика вице-министры Жандос Нұрмағанбетов және қала әкімі Бақытжан Байахметов бастаған топ ең алдымен «Ғаббасов» қазандығына келді. Аталмыш нысанды аралау барысында қала әкімі Бақытжан Байахметов қаладағы жылумен қамтудың жағдайы туралы баяндады.
— Қазіргі таңда қала бойынша жылу желілері 60 пайызға тозған. Екі құбырлы 188 шақырымды құрайтын жылу желілері қайта жаңартуды қажет етеді. Семейде «Теплокоммунэнерго» мекемесінің белгіленген қуаты 1042,9 Гкал/сағ құрайды. Биылғы жылы Степной кентіне құны 565,2 млн теңгенің жылу желісін салу жоспарланған. Сондай-ақ құны 721,7 млн теңге болатын ЦТП-518 қазандығын, 539,3 млн теңгеге жылу желісін қайта жаңартуға сараптаманың оң қорытындылары алынды.
«Ғаббасов», «Орталық» қазандықтарын қайта жаңғырту жұмыстарына республикалық бюджеттен 2 млрд теңге бөлінді. 5 қазандықты қайта құру кезінде 10,3 млрд теңге көлемінде қаражат бөлу қажет, – деді Семей қаласының әкімі Бақытжан Кәкенқажыұлы.
Жалпы, бүгінгі күні Семейдің жылу беру нысандарындағы жаңғырту және ағымдық жөндеу жұмыстары қарқынды жүргізілуде. Мәселен, бірқатар жылу қазандықтары кеңейтіліп, қосымша нысандар салынуда. Бұл қолға алынған жобалардың нәтижелі болуына септігін тигізбек. Осы бағыттағы жұмыстардың барлығы Абай облысының әкімі мен қала әкімінің назарында тұр. Алдағы жылу беру маусымының басталуына дейін барлық жоспарлы шараларды еңсеру көзделіп отыр.
Сонымен қатар вице-министрлерге Семейдегі 3-ЖЭО құрылысының қажеттілігі туралы айтылды. Бұл жобаны іске асыру үшін инвестиция сомасы 447,5 млрд теңгені құрайды. Министрліктердің өкілдері өз кезегінде жылумен қамту проблемаларын шешуде қолдан келгенше көмек көрсететіндерін мәлімдеді.
Министрлік өкілдері қаладағы «35-ші квартал» жылу беру қазандығында да болып, онда жүріп жатқан жөндеу жұмыстарымен танысты. Қысқы мезгілде берілетін жылу сапасы жайлы сұрап, туындап отырған мәселелерге қанықты.
Министрлік өкілдері жұмыс сапары барысында «Теплокоммунэнерго» мекемесінде қаланың жылу желілерінің картасымен танысты.
Қазіргі күні шаһардағы ықшам аудандардың жылу беру бойынша жүктемесі нақтыланған. Болашақта туындайтын мәселелердің алдын алу мақсатында жұмыстар жүргізілуде. Бұл орайда ҚР Энергетика министрлігі тарапынан тиісті көмек көрсетілетін болады. Ол жайында ҚР Энергетика вице-министрі БАҚ өкілдеріне берген сұхбатында айтты.
— Бүгін біз Семей қаласын жылумен қамту сызбасын зерттедік, тұрғындардан шағым көп түсетін мәселелермен таныстық. Осыған байланысты арнайы жұмыс тобын құрып, ақпарат жинап, барлық ұсыныстарды қарастыру ұсынылады. Әрине, қалаға жылумен жабдықтаудың перспективалық сызбасы қажет, оңтайлы шешімдерді анықтау қажет. Бұл жұмысқа біз Энергетика министрлігі ретінде атсалысуға дайынбыз. Жылумен жабдықтау, қазандықтардың жұмысы және оларды қаржыландыру мәселелері Индустрия және инфрақұрылымдық даму министрлігінің құзыретіне жататынына қарамастан, біз министрлік желісі бойынша да қатысып, нақты ұсыныстарды қарайтын боламыз,- деп атап өтті Энергетика вице-министрі Жандос Нұрмағамбетов.
ҚР Энергетика вице-министрі Жандос Нұрмағанбетов сонымен қатар Шығыс жүйеаралық электр тораптары филиалында болып, Семей қаласын электр энергиясымен үзіліссіз қамтамасыз ету бағытында атқарылып жатқан шаралармен танысты.
Болашақта Абай облысының орталығында электр қуатының тапшылығы туындамас үшін желілерді қайта құрылымдау бойынша жүргізілуі тиіс жұмыстар бар. Бұл жұмыстар аталмыш министрлік тарапынан қолдау табатын болды.
Қ. ЖОЛЫМБЕТ,
«Семей таңы»
