Семей қаласы мәслихатының кезекті, 25-ші сессиясында депутаттар тұрғындар үшін тұрмыстық қатты қалдықтарды жинауға, тасымалдауға, сұрыптауға және көмуге арналған тарифтерді бекітті.
Көп қабатты тұрғын үйлер үшін айына 1 тұрғынға 420 теңге, жеке сектордағы тұрғын үйлер үшін 1 тұрғынға 553,22 теңге мөлшерінде бекітілді.
Сессияда сондай-ақ мәслихат депутаттары жол қозғалысы қауіпсіздігін қамтамасыз ету жөніндегі ақпаратты тыңдады.
Ағымдағы жылдың 5 айында Семей қаласында 64 жол-көлік оқиғасы тіркелген, онда 90 адам жарақат алып, 4 адам қайтыс болған.
Жыл басынан бері кәмелетке толмағандардың қатысуымен 14 жол-көлік оқиғасы орын алған, кәмелетке толмағандар арасында қаза тапқандар жоқ.
Жалпы, жол қозғалысы ережелерін бұзғаны үшін 16 145 адам жауапқа тартылды, оның ішінде көлік құралын мас күйінде басқарғаны үшін 168 адам, телефонды пайдаланғаны үшін 987 адам, жаяу жүргіншілердің жол жүру ережелерін бұзғаны үшін 2963 адам жауапкершілікке тартылған.
Семей қаласы полиция басқармасының жедел басқару орталығы бейнебақылау камералары арқылы 4 791 әкімшілік құқық бұзушылық анықталған, оның ішінде жол қозғалысы желісі бойынша 4 071 құқық бұзушылық тіркелген.
Ескі көпірде салмағы 2 тоннадан асатын көлік құралдарының қозғалысын шектеу белгісі орнатылған. Көпірде 5 жол-көлік оқиғасы тіркелген.
Жол белгілерінің талаптарын бұзғаны үшін 67 адам әкімшілік жауапкершілікке тартылған.
Жол-көлік оқиғаларының санын азайту үшін бағдаршамдарды ауыстыру, жасанды жол кедергілерін орнату, әсіресе мектептердің жанында, жер үсті жаяу жүргіншілер өткелдерін салу, жүру бөлігін кеңейту, жол белгілерінің санын ұлғайту қажеттігі айтылды.
Мәслихат сессиясында депутаттар жұмыспен қамту, әлеуметтік бағдарламалар және азаматтық хал актілерін тіркеу бөлімінің Семейдегі жұмыссыздық деңгейін төмендету бағытында атқарып жатқан жұмыстарының есебін тыңдады. Аталған бөлімге қаланың жоғары оқу орындары мен колледждерімен бірлесіп, жастарды қолдау, сондай-ақ түлектер мен жас мамандарды жұмысқа орналастыру жөніндегі мемлекеттік бағдарламалардың іске асырылуы туралы ақпараттандыру мәселесінде жұмысты күшейтуді ұсынды. Сондай-ақ бұқаралық-ақпарат құралдары мен әлеуметтік желілерде жас мамандарды даярлау және қайта даярлау бойынша қаржыландырылатын жобалар туралы ақпаратты жандандыру қажет.
Мәслихат депутаттары Семей қаласындағы жасыл желектерді күтіп ұстау және қорғау туралы ақпаратты тыңдап, қала әкімі Бақытжан Байахметовке ұсыныс жасады: 1. Жасыл желектер тізілімін әзірлеу және бекіту бойынша жұмыс жүргізу; 2. Семей қаласының дендрологиялық жоспарын әзірлеу; 3. Жасыл екпелердің стационарлық суару жүйесін әзірлеу және енгізу; 4. Семей қаласының абаттандыру және көгалдандыру объектілерін бірыңғай басқару органын айқындау; 5. Семей қаласының жасыл желектерін күтіп ұстау және қорғау бойынша қаланы қызмет көрсету аймақтары бойынша бөлу.
Семей қаласы әкімдігінің баспас өз қызметі
