Қала әкімінің ауыл тұрғындарымен кездесулері әлі де жалғасуда. Өткен аптада Семей қаласының әкімі Бақытжан Байахметов Мұқыр және Мұрат ауылдарында болып, орташа жөндеу жұмыстары жүргізілген кірме жолдардың сапасын тексерді. Ауыл тұрғындарымен жиын өткізіп, атқарылған және алда атқарылар жұмыстар туралы баяндады.
Бүгінде аталған ауылдық округтерде тұрғындардың әл-ауқатын жақсартуға, ауылдарды тұрақты дамытуға бағытталған «Ауыл – Ел бесігі» арнайы жобасы жүзеге асырылуда. Еске сала кетейік, жоба ауыл халқының өмір сүру сапасын арттыру және ауылдық аумақтардың әлеуметтік ортасын жаңғырту, оларды өңірлік стандарттарға дейін жеткізу мақсатында әзірленген.
Аталған жобаны тиімді ілгерілету мақсатында 2025 жылға дейінгі жұмыстардың жеке жоспар-кестесі әзірленген. Құжатта қазіргі таңда түрлі жобалар жүзеге асырылып жатқан Семей қаласының ауылдық елді мекендері туралы мәліметтер бар.
— Ауылдық округ тұрғындарымен әрбір кездесуімде орындалған және ауылдарды абаттандыру бойынша әзірленіп жатқан жұмыстар туралы егжей-тегжейлі айтып жүрмін. «Ауыл – Ел бесігі» бағдарламасы бойынша Семей өңірінде ауылдарға кіреберіс жолдарды орташа жөндеу, су құбыры желілерінің құрылысы, көшені жарықтандыру және т.б. бірқатар жұмыстар атқарылуда, — деп атап өтті Бақытжан Байахметов.
Кездесу барысында Мұрат ауылының тұрғындары көлік қозғалысының жылдамдығын шектейтін жол белгілерін орнатуды және жаяу жүргіншілер жүретін жолды белгілеуді сұрады.
Қала әкімі аталған мәселені шешуді жолаушылар көлігі және автомобиль жолдары бөліміне тапсырды.
Сондай-ақ тұрғындар ауылда көше жарығы мен балалар алаңын орнату туралы өтініштерін де жеткізді.
— Тұрғын үй-коммуналдық шаруашылық бөлімі тарапынан Мұқыр, Прииртышский және Мұрат ауылдарына көше жарығын орнатуға жобалық-сметалық құжат әзірленуде. Бұл жоба «Ауыл – Ел бесігі» бағдарламасы бойынша 2023-2024 жылдарға жоспарланған, — деді Бақытжан Байахметов.
Ауыл тұрғындары клуб құрылысын салу мәселесін де қарастыруды сұрады. Бұл мәселе ауыл кәсіпкерлерінің қолдауымен модульдік эскиздер дайындалғаннан кейін қаралатын болады.
Бүгінгі күні Мұрат ауылында ұзындығы 5,5 шақырым, ал Мұқыр ауылында ұзындығы 3 шақырым кірме жолды орташа жөндеу жұмыстары аяқталды. Мердігерлік ұйымдар фрезерлеу және асфальт жабынын төсеу үшін арнайы техника жұмылдырды.
Дана ТАЛҒАТБЕК
