Абай облысының әкімі Нұрлан Ұранхаев Мемлекет басшысы Қасым-Жомарт Тоқаевтың Үкіметтің кеңейтілген отырысында берген тапсырмаларын басқарма басшыларымен, мәслихат депутаттарымен және кәсіпкерлермен бірге талқылап, алдағы уақытқа жоспарланған жұмыстарды пысықтады.
Жиын барысында Нұрлан Тельманұлы Президент атап көрсеткен мәселелерге тоқталып өтіп, жаңадан құрылған облысымызда атқарылуы тиіс шаралар туралы айтты.
– Президент тапсырмасы — күрделі геосаяси сын-қатерлер тоғысында дамудың жаңа кезеңіне бағыт беретін эволюциялық жаңғыру тұжырымдамасы, ал Үкімет пен әкімдіктер үшін стратегиялық бағдар екені анық. Сондықтан біз іс – қимылымызды үйлестіріп, қазіргі жағдайды жан-жақты зерделеп, Мемлекет басшысы қойған міндеттерді іске асыру үшін нақты шаралар қабылдауымыз қажет, — деп атап өтті облыс әкімі Нұрлан Ұранхаев.
Жиынға қатысушылар халықты жұмыспен қамту мәселелерін талқылады. Ағымдағы жылы Абай облысында 13 477 жаңа жұмыс орнын құру жоспарлануда. Бұл ретте Жарма ауданында «Цемент зауытын қалпына келтіру» жобасын іске асыру есебінен ғана 1085 жұмыс орны құрылады.
– Алда экономиканың барлық салаларының бәсекеге қабілеттілігі мен инновациялық құрамдасын арттыру жөнінде ауқымды жұмыс тұр. Президенттің тапсырмаларын іске асыруға әркім өз аумағында тікелей және белсенді қатысуы тиіс, — деді Нұрлан Ұранхаев.
Аймақ басшысы баға мониторингін жүргізу мен жұмыс топтарының отырыстарында әлеуметтік маңызы бар азық-түлік тауарларының бағасын шектеу бойынша қабылданған шаралар нәтиже бермегенін айтты.
Бағаны ұстап тұру мақсатында Семейде 5,5 мың тонна картоп пен көкөніске арналған «Жоламан» көтерме сауда орталығы жұмыс істеп тұр. Әлеуетті инвесторларды тарта отырып, қосымша көтерме сауда орталықтарын салу мәселесі қарастырылуда. Сондай-ақ әлеуметтік маңыздағы өнімдердің бағасын реттеуге мүмкіндік беретін өзіндік тұрақтандыру қоры бар өңірлік ӘКК құруға қатысты жұмыстар басталды.
— Алдағы қыста біз «Жоламан» көтерме сауда орталығында көкөністерді арзан бағамен өткізу және нарықтағы бағаның өсуін тежеу үшін картоп, қырыққабат, сәбіз сынды көкөністер қорын әзірлейміз. Және бұл бағытта барлық отандық тауар өндірушілермен жұмыс істегіміз келеді. Отандық бизнес Қазақстан экономикасын дамытуға атсалысуы керек. Сондай-ақ Семей қаласында халықаралық сауда да дамуы қажет деп есептейміз, бұған Ресейдің де, Қытайдың да жақын орналасқандығы үлкен мүмкіндік береді, бірақ бұл үшін мемлекет тарапынан қолдау қажет, – деп «Ақшың» корпорациясының президенті Марат Құрманбай өз ұсынысын білдірді.
Жұмыссыз азаматтардың табысын арттыруды қамтамасыз ететін негізгі шаралардың бірі — 2025 жылға дейінгі кәсіпкерлікті дамытудың ұлттық жобасы аясындағы халықты жұмыспен қамтуға жәрдемдесу шаралары. Жаңадан құрылып жатқан Абай облысында да бұл бағыттағы жұмыстарды жандандыру керек.
Жиын барысында айтылғандай, Президент Жолдауында көрсетілген экономиканы тұрақтандырып, халықтың әл-ауқатын арттыруға бағытталған маңызды қадамдар мен шешімдерді жүзеге асыру үшін облыста ауқымды істер атқарылуы қажет. Осыған орай Абай облысының әкімі Нұрлан Ұранхаев басқарма басшыларына бірқатар тапсырмалар жүктеді. Нақтырақ айтар болсақ, тауар өндірушілерге сауда желілері арқылы емес, тікелей кредит беру тетігін әзірлеу; жаңа жұмыс орындарын ашу, жастарды жұмыспен қамтамасыз ету; отбасының әл-ауқатының деңгейіне қарай әлеуметтік кепілдіктердің барлық түрлері дербестендірілетін отбасының цифрлық картасы мен әлеуметтік әмиянды іске қосу; мектепке дейінгі мемлекеттік мекемелерде бейнебақылау жүйесін кеңейту; балаларды зорлық-зомбылықтан қорғау, суицидтің алдын алу, әр баланың құқықтарын қамтамасыз ету жөніндегі кешенді жоспар әзірлеу; ана мен бала өлімін азайту жөніндегі жол картасын әзірлеу шараларын қолға алу қажет.
Сонымен қатар облысқа қарасты барлық медициналық ұйымдарды интернетпен қамтамасыз ету; 2023-2025 жылдарға арналған республикалық бюджетке 11 мектеп салуды енгізуге қатысты шаралар қабылдау; барлық коммуналдық қызметтерге, салықтарға, сервис салаларына бірыңғай төлем құжатын енгізу мәселесін пысықтау шаралары да күн тәртібінде тұр.
Динара НҰРЛЫБЕКҚЫЗЫ,
«Семей таңы»
