Биыл Семейде жаңа демалыс орны пайда болады. Бұл – воркаут аймақтар, стрит-арт, фитнес-алаңдары.
Оң жағалауда, аспалы көпір астынан қала тұрғындары мен қонақтары үшін демалыс алаңын жасау көзделіп отыр. Алдағы айларда көпірдің бетон бағаналары мен қабырғалары стрит-арт стилімен әр түрлі ашық түстерге боялатын болды. Бұл мәдениет және спорт тақырыбындағы граффити болмақ. Аталған аумақ спорт және балалар ойын алаңы болып екіге бөлінеді. Спорт алаңында стритболмен, көше фитнесімен және кроссфитпен айналысуға арналған аумақ ашылады деп жоспарланып отыр. Ал балалар ойын алаңында әткеншектер, ойын кешендерін салу көзделуде. Жаңа демалыс орнында сонымен қатар жасөспірімдер үшін скейт алаңы және паркур кеңістігі пайда болмақ. Ертіс өзенінің жағалауында тамақтануға арналған павильондар орналасады. Көпір астындағы алаң толықтай көгалдандырылады. Сондай-ақ қимыл-қозғалысы шектеулі тұрғындардың қауіпсіздігі үшін жаяу жүргіншілер өткелі жасалады. Жаңа алаңның жалпы ауданы – 3500 шаршы метр. Айта кетейік, барлық жұмыстар демеушілердің қаражаты есебінен жүргізіледі. — Биыл 12 жаңа қоғамдық кеңістік құру жоспарлануда. Қаладағы демалыс орны, біріншіден, адамның мінез-құлқын, мәдениетін қалыптастырады. Таза, әдемі, абаттандырылған жерді ешкім ластағысы келмейді. Екіншіден, бұрын қараусыз қалған жерлер қала тұрғындарының көңілінен шығатын орынға айналуы мүмкін. Бірі кофе ішеді, екіншісі балаларын ойнатады, басқалары таза ауада спортпен шұғылданады. Көпір асты кеңістігінің артықшылығы – кез келген ауа райында қолайлы. Жаңбырдан немесе күн сәулесінен қорғанып, қалаған уақытта спортпен айналысып, демалуға болады,- дейді облыс әкімі Нұрлан Ұранхаев.
Биыл Семейде жаңа демалыс орны пайда болады. Бұл – воркаут аймақтар, стрит-арт, фитнес-алаңдары.
Абай облысы әкімдігінің баспасөз қызметі
