Өткен сәрсенбі күні «Отбасы банк» АҚ Абай облыстық филиалының ұйымдастыруымен «Abai Otbasy Fest» жылжымайтын мүлік жәрмеңкесі өтті. Шаһардағы «Арбат» демалыс алаңында өткен іс-шараға банктің іскерлік серіктестері — құрылыс компаниялары қатысып, қала тұрғындарына өз пәтерлерін ұсынды. Жәрмеңкеге келген семейліктер мен қала қонақтары әрбір құрылыс компаниясы туралы толық ақпарат алып, баспана алудың шарттарымен танысты. Сондай-ақ пәтерлердің шаршы метрінің бағаларын салыстырып, таңдау жасауға мүмкіндік алды. — Біздің банк — бүгінде «Бәйтерек» холдингінің еншілес ұйымы. Қазір бізде 18 филиал бар, Семей қаласында Абай облысының филиалы бар. Біз тұрғын үй жағдайын жақсартуға, үй салуға, жеке үйлер мен пәтерлер сатып алуға несие беру қызметтерін ұсынамыз. «5-10-20», «Бақытты отбасы», «Әскери баспана»сияқты мемлекеттік бағдарламалардың операторлары болып табыламыз. Бүгінгі жәрмеңкеде баспана алуға ниеттеніп жүрген қалалықтар өздеріне ұнаған бағдарламаға қатысып, біздің банктің салымшысы бола алады, — дейді «Отбасы банк» АҚның Абай облыстық филиалының директоры Раиль Сәбитов. Сонымен қатар жәрмеңкеге келген қала тұрғындары «Отбасы банкінің» облыстық филиалы қызметкерлері тарапынан ұйымдастырылған түрлі сайыстарға қатысып, «Феникс» музыкалық тобының концертін тамашалап қайтты.
Кербез ДУЛАТҚЫЗЫ,
«Семей таңы»