Жылдағы дәстүрге сай 1 қыркүйек – Білім күнінде Абай облысының барлық мектептерінде алғашқы қоңырау салтанаты болып өтті.
Бір айта кетер жаңалық, биыл Абай облысы бойынша жалпы саны 1 700 орын болатын төрт жаңа мектеп есік ашты. Бұл соңғы жылдардағы ең үлкен көрсеткіш болып отыр.
Сонымен қатар, ағымдағы жылы бірінші сыныптың табалдырығын аттайтын балақайлар санының да артқаны байқалады. Биыл Абай облысында 10 280 оқушы тұңғыш рет мектеп партасына отырды.
Мәселен, жаңа мектептегі алғашқы қоңырау Семей қаласындағы Шығыс сол жақ саяжай алабының оқушылары үшін соғылды. Мұнда білім күні көптен күттірген 1200 орындық жаңа мектеп салтанаттты түрде ашылды. Аталмыш айтулы шараға арнайы келген Абай облысы әкімінің бірінші орынбасары Айдын Кәрімов барша көпшілікті құттықтады.
-Бірінші қоңыраудың дыбысымен әрбір адамның жеке тұлға және азамат ретінде қалыптасу кезеңі басталады. Сіздерге білімдеріңізді жетілдіріп, жарқын жетістіктерге жетіп, жаңа белестерді бағындыруды тілеймін!,- деп атап өтті ол өз сөзінде.
Сол тәрізді дәл осы күні Семей қаласында «Semey New School» жаңа мектебі пайдалануға берілді. Қазақстанда алғашқы рет жаңа «мектеп + кәсіп» форматында білім беретін мектептің ашылуына облыс әкімінің орынбасары Шалқар Байбеков қатысты.
— Құрметті оқушылар, қадірменді ата-аналар, ұстаздар! Бүгінгі күнгі Білім күнімен құттықтаймын! Мектеп табалдырығын аттап жатқан қадамдарыңыз құтты болсын! Жаңа үлгідегі мектептің ашылуы бұл Семей қаласы үшін үлкен қуаныш. Ең бастысы, осы мектеп табалдырығын аттаған оқушыларға айтарым, қадамдарыңыз оңынан болып, білім жолында тек өрлей беріңіздер! — деп тілек білдірді Шалқар Заманбекұлы.
Жаңа мектептің ерекшелігі – мектеп қабырғасында оқушыларға орта біліммен бірге қатар IT, қаржы және құқық саласында кәсіби курстардың оқытылуы. Сондай-ақ, Semey New School-да білім беру интеграцияланған оқу бағдарламаларының негізінде жүргізіледі. Күннің бірінші бөлігінде балалар мемлекеттік стандарттарға сай білім алатын болса, екінші бөлігінде қосымша пәндерді тереңдетіп оқыту және қаржы, құқық пен IT-технологиялар салаларындағы әртүрлі кәсіптерді игеруге арналады.
Шара соңында мектеп оқушыларына ізгі тілек жазылған қағаз ұшақтар ұшырылды.
Дана ТАЛҒАТБЕК,
«Семей таңы»
