Әйгерім СӘРСЕНҒАЛИ
«Семей таңы»
1941 жылдың 22- маусымы күні таңғы сағат төртте тыныш жатқан бейбіт елдің берекесі бұзылды. Бұл күні талай шаңырақты от шарпып, миллиондаған адамның өмірін жалмаған адамзат тарихындағы ең жойқын соғыстың басталған кезі еді. Фашистік Германия Кеңес Одағына басып кірді. Тарихта Ұлы Отан Соғысы деген атпен қалған сұрапыл соғыстан қазақстандықтар да шет қалмады. Соғыс жылдары Кеңес Одағының өзі 27 млн. боздағын жоғалтты.
Тарихта Ұлы Отан соғысы атауымен қалған алапат соғыс адамзат өміріне өшпестей із қалдырды. 73 жыл бұрын баланы жетім, ананы жесір атандырған соғыс 1418 күнге созылып, Отан үшін отқа түскен ерлердің ерлігімен аяқталды.
Адамзат баласының жадында жатталуы тиіс қасіретті күнге байланысты жыл сайын Семейде түрлі шаралар ұйымдастырылады. Мәселен, Семей қаласының облыстық тарихи өлкетану музейінің еңбек пен ерлік даңқы бөлімінде осы күнге арналған ауқымды шара ұйымдастырылды. Жиынға Семей қалалық ішкі саяат бөлімінің басшысы Ғалия Смайылова, ҰОС және тыл ардагерлері, әскери техникалық мектептің курсанттары мен қала тұрғындары қатысты.
Еңбек пен ерлік даңқы бөлімі 1985 жылы Ұлы Жеңістің 40 жылдығына орай ашылған.
Соғыс жылдарындағы біршама тарихи деректер мен ақпаратты, тарихи жәдігерлерді қамтыған мұражай бүгінгі күнге дейін ұрпақтарды отансүйгіштікке тәрбиелеу жолында қызмет етіп келеді. Жыл сайын маусым айында соғыс және тыл ардагерлері осы жерде жиналып, тарихқа тағзым етуді дәстүрге айналдырған.
{jcomments on}Бұл күні майдан жайында естеліктер айтылып, ерен ерліктер еске алынады. Бүгінгі бейбіт өмірдің қадірін бағалай білетін кешегі бозбала, бүгінгі ардагер Михаил Червинский осы жиында жадында жатталып қалған естеліктерімен бөлісті.
— Соғыс басталған кезде мен бар болғаны 14 жаста едім. Елдегі арқа сүйер азаматтар майданға аттанып, ауыртпашылықтың барлығы да қарттар мен балаларға жүктелді. Барша аналар қауымы ерлермен тең дәрежеде еңбек етіп, қайсарлық танытты. Азық-түлік тапшылығын, аштықты да көрдік. Жараланып қайтқан жауынгерлерді, қара қағаз алып, аңыраған отбасыларын көрдік. 17 жасқа толған шағымда мен де жауынгер атандым. Соғыс деген үлкен зұлмат. Сол зұлматта Отан үшін аянбадық. Бізде бір ғана тілек — жеңіске деген жігер болды. Қайсарлық, рух, Отанға деген сүйіспеншілік біздің жеңіске бастар басты күшіміз болды, — деген қарт майдангер енді соғыс болмасын, бейбіт өмірдің бақытты ұрпақтары қиыншылықты көрмесін деп тіледі.
ҚР Қорғаныс министрлігінің Семей қаласындағы әскери-техникалық мектебі директорының жастарды әскери патриоттыққа тәрбиелеу ісі бойынша көмекшісі, майор Леонид Винигин де өз ойын ортаға салды.
-Бүгінгі шараға курсанттарымызбен қатысып отырмыз. Тарихи өлкетану музейінің еңбек пен ерлік даңқы бөлімімен мектебіміз тығыз байланыста. Жыл сайын аталмыш шарадан қалыс қалмаймыз. Жүзеге асырылып отырған шараның жастар үшін берері мол. Ұрпақты патриоттық тұрғыда тәрбиелеуде, Отанына деген сүйіспеншілігін арттыру үшін осындай кездесулерді жиі өткізіп тұру керек, — деді Винигин.
