Semeytany.kz — Бүгін Абай облысының әкімі Берік Уәли Төтенше жағдайлар департаментінің басшысы Манарбек Шапағатовпен бірге Ертіс өзені бойымен Семей қаласы аумағындағы су басу қаупі жоғары учаскелерді аралады. Мониторинг жедел құтқару жасағының патрульдік катерімен жүргізілді.
Аралау барысында алдағы жылдары жағалауды бекіту жоспарланған аумақтардың жағдайы қаралды. Атап айтқанда, Бейбітшілік аралына жақын тұстар мен Бобровка ықшам ауданы маңындағы жағалау сызығы, сондай-ақ жаз мезгілінде тұрғындар көп жиналатын, ресми түрде жабдықталмаған суға түсу орындары мен жұмыс істеп тұрған жағажайлар назарға алынды.
ТЖ департаментінің басшысы Манарбек Шапағатов аймақ басшысына су айдындарындағы қазіргі жағдай туралы, рұқсат етілмеген жерлерде шомылу фактілері, су тасқыны қаупі бар проблемалық учаскелер және жағажай инфрақұрылымын ретке келтіру жөніндегі шаралар туралы баяндады.
Берік Уәли жауапты органдарға өзен бойында мониторингті күшейтуді, қауіпті аймақтардағы тәуекелдерді азайту бойынша кешенді шараларды уақытылы қабылдауды және су тасқыны кезеңіне алдын ала мұқият дайындалуды тапсырды.
