ҚАЛА КҮНІ ҚАЛАЙ ТОЙЛАНДЫ?
Өткен сенбі-жексенбі күндері Абай облысының орталығы болған Семей қаласының тұрғындары Қала күнін кең көлемде атап өтті. Жайма-шуақ күн райы да қалалықтарға шат-шадыман көңіл-күй сыйлап, мерекені барынша сән-салтанатпен атап өтуге игі ықпал етті.
Қала күнін мерекелеу облыста алғаш рет ұйымдастырылған Абай марафонымен басталды. Бүкіл қала ішімен жүгіріп өтуге бел буған, спортты серік ететін семейліктер мен қонақтар таң ата Абай алаңына жиналды. Спортпен бұрыннан шұғылданатын, сондай-ақ салауатты өмір салтына енді бет бұрған марафоншыларға қолайлы болуы үшін 3,5,10 шақырымдық қашықтық ұсынылды.
Бұл шараға шаһардағы мекемелер мен ұйымдардың ұжымдары қатысқан болатын. Мәреге жеткен әр спортшы естелік медаль және футболкамен марапатталды. Ерлер мен әйелдер арасындағы әрбір ең үздік нәтиже көрсеткен үш қатысушы жүлдегерлер арнайы медаль иеленді. Салтанатты марапаттау рәсімі ұйымдастырылып, барлық жеңімпаздар қала жұртшылығының қошеметіне бөленді.
Жеңімпаздарға медальдарды облыс әкімі Нұрлан Ұранхаев, әкімнің бірінші орынбасары Айдын Кәрімов, облыс әкімнің орынбасары Шалқар Байбеков, сонымен қатар облыс әкімдігінің басқарма басшылары табыс етті.
Ал Қала күні Абай марафонынан соң Орталық алаңда мерекелік концертпен жалғасты. Абай алаңы мен Ертіс жағалауында да мерекелеушілер жергілікті өнерпаздардың концерттік бағдарламаларын тамашалады. Мерекелік шарада мұражайлар мен кітапханалардың қала тарихынан сыр шертетін көрмелері, қолөнер шеберлерінің туындылары көпшілік назарына ұсынылды. Ал жастар Арбатта жанды дауыста ән салып, өзара өнер сайысына түсті. Ертіс жағалауында қала мектептері мен мектепке дейінгі мекеме тәрбиеленушілерінің қолөнер туындыларының көрмесі, зияткерлік ойындар ұйымдастырылды.
Қала халқы Абай Құнанбаев, Шәкәрім Құдайбердіұлы, Мұхтар Әуезов, Әлихан Бөкейхан, Қайым Мұхамедханов, Әміре Қашаубаев, Ф.Достоевский және Ш.Уәлиханов ескерткіштері мен «Өлімнен де күшті» монументі және Азамат соғысы батырларының мемориалына тағзым етіп, гүл шоқтарын қойды.
Одан соң аспалы көпір астындағы қоғамдық орын ашылды. Ол жерге уоркаут алаңқайлар, скейт парк, паркур алаңдары жасалған. Көпір асты алаңы бірнеше бөлікке бөлінген. Жасөспірімдер үшін стритболға арналған спорттық аймақ, фитнес аймақ және балалардың ойын алаңы жасақталған.
Жаңа қоғамдық орынның жалпы алаңы — 3500 шаршы метр. Айта кетерлігі, бұл қоғамдық орын демеушілердің қаражаты есебінен жабдықталып отыр.
Қоғамдық орынның ашылуына облыс әкімі Нұрлан Ұранхаев қатысты.
— Аспалы көпір астындағы демалыс орнын жасап, тағы бір жақсы жобаны аяқтадық. Бос жатқан жерде спорт, демалыс, көңіл көтеруге арналған аумақ пайда болды. Бұл жерде алдағы уақыттарда спорттық кластер құрылады. Оң жағында екі футбол алаңы, келесі жылы жөндеуден өтетін аквапарк орналасқан. Мұнда көптеген спорт түрі бойынша сайыстар өтетін болады. Бұл жерді мейлінше қауіпсіз етуге тырысамыз. Бүгін «Сергек» камералары орнатылды. Келесі жылы сол жағалауда, көпір маңында жапон бағын жасайтын боламыз, — деді аймақ басшысы.
Таяу болашақта, Нұрлан Тельманұлы айтып өткендей, жалпы қала бойынша 12 жаңа қоғамдық орын жасалатын болады деп күтілуде.
Қала күнінде, Абай облысының құрылуына, сонымен бірге Мұхтар Әуезовтің 125 жылдығы құрметіне орай, Семей қаласында балалар футболының І турнирі өтті. Турнирге 2013-2014 жылдары туған жас спортшылар — «Семей» футбол орталығы мен қаланың жеке меншік футбол мектептерінің тәрбиеленушілері қатысты. Басты мақсат – балалар арасындағы футболды дамыту.
Турнирдің ашылу салтанатына облыс әкімі Нұрлан Ұранхаев, қала әкімінің міндетін атқарушы Димитрий Гариков және қоғам белсенділері келді.
Спорт сайысында балғын спортшылардан құралған сегіз команда кубоктар, медальдар және естелік сыйлықтар үшін өзара бақ сынасты.
Турнирге құрметті қонақ ретінде арнайы шақырылған қазақ футболының жұлдызы Самат Смақов келіп, жасөспірімдерге сәттілік тіледі.
Жанкүйерлер Самат Смақовпен бірге естелік суретке түсіп, әңгімелесіп, қолтаңба алуға мүмкіндік алды.
Ұйымдастырушылардың айтуынша, Абай облысында және Семей қаласында футболды дамыту және бұқараға насихаттау бойынша іс-шаралар жоспарланған. Балалар футбол турнирі болашақта облыстық ауқымда дәстүрлі түрде өткізілетін болады. Яғни, біздің балғын спортшыларымыз да Қазақстан футболының дамуына үлес қосатын болады.
Ал Ф.М.Достоевский атындағы әдеби-мемориалдық мұражайда «Палитрадағы әлем» атты сурет көрмесі ашылды. Бұл — соңғы үш жылдан бері өз туындыларын жарыққа шығарып келе жатқан А.Ляпинаның жеке көрмесі. Жұртшылық назарына суретшінің пейзаж, портрет, натюрморт жанрындағы еңбектері ұсынылған. Суретші туындыларында, негізінен, Семейдің тарихи, ескі бөлігі бейнеленген. Аталған көрмені айдың соңына дейін тамашалауға болады.
Сонымен қатар таңғы сағат 9-дан бастап түске дейін жағалауда көрме, түрлі байқау, шахмат турнирі, флешмобтар өтті.
Орталық алаңдағы мерекелік концерт кешке дейін жалғасты.
Мерекелік шара барысында сондай-ақ тарихи-өлкетану мұражайы Арбатта «Семей — өткенге саяхат» атты көшпелі көрме өткізді.
Орталық алаңда сонымен қатар қалалықтар кітап көрмесін, библиокафе, Достық үйі этномәдени орталықтарының шеберлер қалашығын, тұрғындардың онлайн құттықтау алаңын, М.Әуезовтің 125 жылдығына арналған көшпелі көрмені тамашалады.
Ал түс уақытында Ертіс жағалауында талантты жастардың «Jastar fest» атты фестивалі өтті. Сағат 18.00-де Орталық алаңда әр сала бойынша «Үздік» номинациясының жеңімпаздары марапатталды.
Кешкі 19.00-де Ә.Қашаубаев атындағы филармония және Қалалық Мәдениет Сарайы ұжымдарының Қала күніне әзірлеген концерті басталды. Семейліктер үшін Дастан Оразбеков және Kalifarniya тобы әуелетіп ән шырқады.
Мерекелік шаралар сағат 22.00-де Орталық алаңда отшашумен аяқталды.
Әлібек КЕМЕЛХАН,
Талшын ҚАЛИАСҚАР,
«Семей таңы»
