ОТБАСЫНЫҢ ЦИФРЛЫҚ КАРТАСЫ ІСКЕ ҚОСЫЛДЫ
Әлеуметтік кодекс жобасы аясында 1 қыркүйектен бастап Қазақстанда пилоттық режимде Отбасының цифрлық картасы іске қосылады деп хабарлаған болатын Еңбек және халықты әлеуметтік қорғау министрлігі. Аталған игілікті шара ел бойынша ең алдымен Шығыс Қазақстанда жүзеге асырылуда.
ҚР Еңбек және халықты әлеуметтік қорғау министрлігінің баспасөз қызметі таратқан ақпараттарға қарағанда, бұл ақпараттық жүйе азаматтарға проактивті форматта, яғни алушының өтінішін күтпей-ақ көмек көрсетуді көздейді, сондай-ақ сыбайлас жемқорлық тәуекелдерін төмендете отырып, қызметті жеделдетуге және тиісті мемлекеттік көрсетілетін қызметтердің сапасын жақсартуға мүмкіндік береді.
Отбасының цифрлық картасы – бұл әр түрлі мемлекеттік органдардан алынған мәліметтерді жинақтайтын, азаматтардың әлеуметтік әл-ауқатының деңгейін айқындауға және оларға проактивті форматта кепілдік берілген мемлекеттік қолдау көрсетуге мүмкіндік беретін ақпараттық жүйе.
Отбасының цифрлық картасында 6 млн отбасына бөлінген барлық 19,4 млн азамат туралы деректер толық көлемде жинақталған.
Отбасылардың әл-ауқатының деңгейі бес критерий бойынша айқындалады: экономикалық өмір сүру жағдайлары, денсаулық сақтау қызметтерімен қамту және мүгедектігі бар адамдардың болуы, тұрғын үй жағдайлары, әлеуметтік жағдайлар, білім беру қызметтерімен қамту және отбасы мүшелерінің білім деңгейі.
Шығыс Қазақстан облысында Отбасының цифрлық картасын енгізу 1 қыркүйектен бастап пилоттық режимде қолға алынған болатын. Онда отбасылардың әл-ауқатының деңгейіне қарай әлеуметтік кепілдіктердің барлық түрлері дербестендірілетін болады. Бұл туралы Өңірлік коммуникациялар қызметінде өткен брифингте жұмыспен қамтуды үйлестіру және әлеуметтік бағдарламалар басқармасының әлеуметтік төлемдер бөлімінің басшысы Бұлбұл Құсманова мәлімдеді.
— Отбасының цифрлық картасы — отбасыларды бағалауға, өмірлік қиын жағдайда жүрген адамдарды анықтауға бағытталған әлеуметтік саясат құралдарының бірі. Карта өңірдің және жалпы елдің әлеуметтік портретін жасауға мүмкіндік береді. Сондай — ақ осы жүйе арқылы отбасының материалдық жағдайын, оның әлеуметтік мәртебесін, табысын, өмір сүру деңгейі мен әл-ауқатын анықтауға болады, — деді Бұлбұл Құсманова.
Спикердің ақпараты бойынша, бастапқы кезеңде мемлекеттік органдардың ақпараттық жүйелерінің деректері негізінде отбасылардың әл-ауқатының деңгейін және оларға тиісті мемлекеттік қолдау шараларын анықтау бойынша жұмыс жүргізілді.
— Мемлекеттік қолдау шараларын алуға құқық белгіленген кезде әлеуетті адресатқа қызмет көрсетуге келісім алу үшін СМС-хабарлама жіберіледі. Одан кейін жәрдемақы мен төлемдер тағайындалып, кейін алушының банк шотына аударылады, — деп атап өтті спикер.
Брифинг соңында әлеуметтік төлемдер бөлімінің басшысы жоба кезең-кезеңмен жүзеге асырылатынын айтты. Осы жылы 1 қыркүйегінен бастап жаңа форматта тоғыз қызмет түрін алу мүмкіндігі ұсынылды. 2025 жылы мемлекеттік кепілдіктердің барлық түрлері қамтылатын болады.
