Семей қаласының әкімі Нұрбол Нұрсағатов өткен сенбіде Көкентау ауылдық округіне жұмыс сапарымен барды. Аталған ауылдық округте жедел шешуді талап ететін бірқатар мәселелер бар. Мұндағы жергілікті мектепті қалпына келтіріп, интернатты қайта жаңғыртудан өткізу керек. Сонымен қатар коммуникацияларды қайта жаңарту, ауылдық округтің бес көшесіне ағымдағы жөндеу жұмыстарын жүргізу мәселелері бүгінгі күні өзекті болып тұр.
Сапар барысында қала әкімі интернатты жаңғырту жұмыстарын жүргізу үшін қажетті құжаттарды дайындауды, ауылдық округтің ағымдағы мәселелерін шешу үшін есептеулер жасауды тапсырды. Осы тапсырмалардың іске асырылуын қала әкімі өз бақылауына алды.
Бүгінде Семей қаласы тұрғындарын алаңдатып отырған ең өзекті мәселенің бірі – қоқыс шығару және тұрмыстық қатты қалдықтарға арналған полигонның жай-күйі. Осы мәселені назарына алған Семей қаласының әкімі Нұрбол Нұрсағатов «Хазипов Р.С» ЖК директорымен бірге полигон аумағына барып, ондағы санитарлық жағдайды ретке келтіру үшін бірқатар тапсырмалар жүктеді.
Қоқыстың полигон аумағынан тыс жерге желмен таралуының алдын алу үшін учаскенің айналасына торлы қоршау орнатылатын болды. Сонымен қатар қаланың кварталішілік аумақтарынан қатты тұрмыстық қалдықты шығару мәселесін шешу мақсатында қала әкімі контейнерлік алаңдарды және жаңа форматтағы контейнерлер санын көбейту, қатты тұрмыстық қалдықтарды шығару үшін қосымша машиналар сатып алу үшін іс-шаралар жоспарын әзірлеуді тапсырды.
Ал демалыс күні шаһар басшысы Приречный, Новобаженово ауылдық округтері мен Шүлбі кентіне жұмыс сапарымен барды. Әкім Шүлбі кенті, Новобаженово және Бұлақ ауылдарындағы мектептерді аралап, олардың жабдықталуымен танысты. Шүлбі кентіндегі білім ошақтарын жөндеуге қажетті сметалық есептерді дайындауды тапсырды.
Нұрбол Нұрсағатов кенттегі көп функционалды спорт кешені құрылысы жұмыстарының барысын да көріп қайтты. Қала басшысы мердігер компанияға құрылыс мерзімін бұзғаны үшін бірқатар ескертулер жасап, кент әкіміне осы нысанның құрылыс барысы мен сапасын ерекше бақылауға алуды міндеттеді. Осыдан соң қала әкімі аудандық жылу қазандығының жұмысын тексерді.
Нұрбол Төлегенұлы жұмыс сапары барысында «Приречное «Агрофирма» серіктестігі мен Приречное ауылындағы картоп пен көкөністерді өңдейтін кешенде болды. Шаруашылық цехтары заманауи жабдықтармен жабдықталған, мұнда көкөністер жаңа технология әдісімен кептіріледі. Бұл көкөністердің түсі мен дәмін сақтауға мүмкіндік береді. Кешенде ауылшаруашылық өнімдерінің барлық түрлері, картоп, қызылша, сәбіз, қырыққабат, пияз және ет өңделеді.
Ары қарай қала әкімі Жарқын ауылына ат басын бұрды. Ауыл тұрғындарын мазалайтын негізгі мәселе – жолдардың сапасыздығы. Қала әкімі сала басшыларына жолды қысқа мерзімде жөндеуді тапсырды.
Дана ТАЛҒАТБЕК,
«Семей таңы»
