Семейдегі Жамақаев көшесіндегі тарихи ескерткіштер аллеясының жанында Жазушылар алаңы мен дәрігерлер аллеясы пайда болады. Бұл туралы Абай облысының әкімі Нұрлан Ұранхаев қала көшелерін аралау барысында айтты. Өңір басшысы кедергісіз орта құру үшін жаяу жүргіншілерге арналған өткелдерді қарастыруды тапсырды.
«Бұл учаске жаяу жүргіншілерге арналған. Көше бойында көптеген оқу орындары бар, мысалы: Мұқан Төлебаев атындағы музыка колледжі, мектептер, балабақшалар. Демалуға, шығармашылыққа және спортқа арналған тақырыптық аймақтарды құра отырып, осы алаңда жайлы жағдай жасауды қарастырайық. Шахмат пен домино ойнауға арналған үстелдер орнату туралы ұсыныстар да бар», — деді аймақ басшысы.
Аллеяда жаттығу алаңынан бөлек фаст-фудқа арналған павильондар мен шығармашылыққа арналған орындар арқылы жаяу жүргіншілер аймағын құру жоспарлануда.
Облыс әкімі Нұрлан Ұранхаев саябақтарды абаттандырудан кейін келесі жылы қала тұрғындары үшін, оның ішінде халықтың мобильділігі төмен топтары үшін жайлы және қауіпсіз кеңістіктер құру бойынша жұмыс жалғасатынын айтты.
Абай облысының әкімдігі
