Биыл Қазақстан Республикасы Төтенше жағдайлар министрлігінің құрылғанына 27 жыл толды. Құтқарушылар күні қарсаңында Абай облысы Төтенше жағдайлар департаменті Семей қаласының Өрт сөндіру және авариялық-құтқару жұмыстары қызметінің ұйымдастыруымен БАҚ өкілдеріне арналған баспасөз туры өтті. №1 мамандандырылған өрт сөндіру бөлімінде экскурсиядан басталған тур барысында тілшілер өрт сөндіруші-құтқарушылардың жұмыс күндері қалай өтетінін, қандай жағдайда жұмыс істейтінін көруге мүмкіндік алды. Сонымен қатар журналистер жауынгерлік киімдерді киіп көріп, өрт сөндіру мұражайын аралады.
Дана ТАЛҒАТБЕК,
«Семей таңы»
Жыл сайын төтенше жағдайда қалған мыңдаған адам құтқарушылардың ерлігінің арқасында аман қалады. Дабыл соғылған дауысты көшеден естігенде, жаяу жүргінші, көлік айдаушы болсын, жол бергеннен өзге қолдан келер шарасы жоқ. Кез келген жағдайда, кез келген уақытта ержүрек жігіттер өз өмірлерін қатерге тігіп, көмекке келеді. Бұл күні журналистер жанқияр, қайсар жандар — құтқарушылардың күнделікті өмірін өз көзімізбен көріп, ерекше әсер алдық. Өрт сөндірушінің, құтқарушының рөлінде болып, жұмыс ерекшеліктерімен етене танысып, қызығы мен қиындығын сезіне алдық.
Баспасөз туры Абай облысының Төтенше жағдайлар департаменті өрт сөндіру және авариялық-құтқару жұмыстары қызметі ғимаратының ішін аралаудан басталды. Облыстық Төтенше жағдайлар департаменті өрт сөндіру және авариялық-құтқару жұмыстары қызметі бастығының бірінші орынбасары Еркін Қашқанов қызмет барысы туралы айтып өтті.
БАҚ өкілдері арнайы өрт сөндіру бөлімін, демалыс бөлмесін, оқу жұмыстары жүргізілетін орынды аралап көріп, арнайы өрт сөндіру техникаларымен, атап айтқанда демалуға қолайсыз ортада жұмыс істеуге арналған «Drager» газтұтқыш (тыныс алу аппараты) баллоны мен Holmatro сияқты гидравликалық авариялық-құтқару құралдарымен танысты.
— Абай облысы бойынша Өрт сөндіру және авариялық-құтқару жұмыстары қызметінде 780-ге таяу адам қызмет етеді. Қандай да бір оқыс жағдайлардың алдын алу үшін ең алдымен қауіпсіздік шараларын сақтау керек,- деген Еркін Сәбетқанұлы қауіпсіздік шараларын есімізге салып өтті.
Өзгенің қауіпсіздігін жоғары қоятын сала мамандары қандай жағдайда да ең алдымен адам өмірін құтқарып қалуды ойлайды, үстіндегі кемінде 20 келі болатын қорғаныс киімін, 10-15 келілік зілдей ауыр тыныс алу құрылғыларын мүлде естен шығарып, істеріне бірден кірісетін олардың ыңғайсыздық туралы ойлауға уақыттары да болмайды. Тек қауіпті жағдайға тап болған адамдарды құтқарып, өртті сөндіріп болғаннан кейін ғана денелерінің тер басқанын, қатты шаршағандарын байқайды.
Тур соңында БАҚ өкілдері №1 мамандандырылған өрт сөндіру бөлімінде орналасқан мұражайды аралады. Мұражай меңгерушісі Фархат Еркімбаев Семей гарнизонының өрт сөндіру ісінің даму тарихына тоқталып, экскурсия жүргізді.
Мұражай бүгінде тарих пен сәулет ескерткіштері қатарындағы 1928 жылы салынған өрт сөндіру ғимаратында орналасқан.
Мұражайда өрт сөндіру бөлімінің тарихымен таныстыратын көптеген жәдігерлер, өрт сөндіру күзетінің қызметі туралы құжаттар сақтаулы. Сондай-ақ ертеректе қолданылған және қазір де өрт сөндіруде қолданылатын техниканы көруге болады. Сондай-ақ мұнда өртке дейінгі және одан кейінгі көріністі бейнелейтін бөлме бар, онда келушілерге өрт шыққан кездегі іс-әрекет және қауіпсіздік шаралары түсіндіріледі.
– Біз мұражайға келушілерге техникаларды көрсетіп, өрт сөндірушілердің күнделікті өмірі туралы айтамыз. Бір ерекшелігі – экспозицияда қойылған газ баллондары, электр құралдары сияқты барлық заттар өрт болған орындардан әкелінген. Өзге елдерден әкелінген өрт сөндірушілердің каскалары, жауынгерлік киімдері де бар. Біздің мұражайда сондай-ақ «Жас құтқарушылар» клубы жұмысы істейді. Оған қатысатын оқушылар құтқарудың түрлі әдіс-тәсілдерін меңгереді. Өз өмірін осы саламен байланыстырғысы келетін балалар бұл мамандықтың қыр-сырымен танысады, — дейді өрт күзеті мұражайының меңгерушісі Фархат Фаритұлы.
