Өткен жұма, 9 желтоқсан күні Қалалық Мәдениет сарайында, Тәуелсіздік күніне орай, «Тоңдырды мені» тақырыбымен «Үздік жастар театры – 2022» студенттік театрлар байқауы өтті. Байқаудың мақсаты – студенттердің уақытын тиімді ұйымдастыру, дарынды жастарды қолдау, театр өнерін насихаттау. Семей қаласы Жастар ресурстық орталығының ұйымдастыруымен өткен байқауда қаламыздың жоғары және орта арнаулы оқу орындарынан 8 студенттік театр өнер көрсетті.
Дана ТАЛҒАТБЕК,
«Семей таңы»
Студенттік театрлардың өнерін бағалаған қазылар алқасының құрамында Қалалық Мәдениет сарайының директоры Рашид Асылов, Қазақстан Жазушылар одағының Абай облысы филиалының төрағасы, «Дарын» мемлекеттік жастар сый лығының лауреаты Мерей Қарт, Абай облысының мәдениет, тілдерді дамыту және архив ісі басқармасының бас маманы Самат Кәріпжанов, Абай атындағы музыкалық драма театрының актері Асхат Мәукенов болды.
Байқау шымылдығын Мұхтар Әуезов атындағы педагогикалық колледждің «Ес-Аймақ» театры «Қара орамал» қойылым ымен ашты. Қойылым, «Мамочкина моласынан» естимін, сақ-сақ еткен сәбилердің күлкісін»,- деп Ғалым Жайлыбай айтып кеткендей, сталиндік зобалаң жылдардағы әйелдердің азапты тағдырынан сыр шертеді.
— Біз қойған «Қара орамал» спектаклі Қарағанды лагеріндегі әйелдердің қасіретке толы тағдыры жайында. Түрлі азапты басынан кешірген, аш құрсақ жүкті әйелдер өз нәрестелерін тірі күйінде өмірге әкеле алмаған, ал жарық дүниеге келгендері шетінеп кетіп жатқан. Қойылымда біз сол кездегі әйелдердің зорлық-зомбылыққа толы азапты тағдырын көрермен жүрегіне барынша жеткізуге тырыстық. Ақырғы көріністе аяғы ауыр әйел босанады, бірақ баласы шетінеп кеткеннен кейін «Мамочкина моласына» барып, баласын өз қолымен жерлейді. Сол кездегі қоғамға лағнет айтқан ананың зарын көрерменге жеткізе алдық деген ойдамын, — дейді «Ес-Аймақ» жастар театрының әртісі Жанель Ақжолтаева.
Студенттік театр байқауында туған елінің азаттығы мен тәуелсіздігі жолындағы қазақ жастары көтерілген 1986 жылғы желтоқсан оқиғасы да сахналанды. «Авиценна» жоғары медициналық колледжіндегі «Дауа» студент жастар театры ұсынған «Желтоқсанның мұзға жанған алауы», Рымбек Байсейітов атындағы қаржы-экономикалық колледжінің «Руханият» театры сахналаған «Желтоқсан рухы» қойылымдары көрерменнің жан дүниесін бейжай қалдырмады.
Әділ қазылар алқасының назарына тарихтан сыр шерткен өзге де қойылымдар ұсынылды. Құрылыс колледжінің «Шаңырақ» жастар театры «Тарихты түгендеу», Семей жоғары көп салалы колледжінің «Өнер» театр студиясы «Тұран даланың тұмарлары» қойылымын көрсетсе, Шәкәрім университетінің «Қарагөз» театры «Тағдыр ма әлде?..», Электротехникалық колледждің «Әлем» театры «Заман ағымы» шығармасын сахналады. Мұқан Төлебаев атындағы музыкалық училищенің «Ес-Аймақ» студент жастар театры байқадың шымылдығын жапты.
Өзара бақ сынасқан 8 студенттік театрдың ішінде І орынды қанжығаларына байлаған М.Әуезов атындағы педагогикалық колледждің «Ес-Аймақ» жастар театры жеңімпаз атанды. ІІ орынға Шәкәрім университетінің «Қарагөз» театры лайықты деп танылды. Жүлделі ІІІ орынды М.Төлебаев атындағы музыкалық училищенің «Ес-Аймақ» жастар театры иеленді.
Кез келген қойылымның сәтті шығуы тұтас ұжымға байланысты десек, оның ішінде режиссердің еңбегі ерекше екені белгілі. Байқауда режиссерлер де қазылардың назарынан тыс қалмады. «Қарагөз» театрының жетекшісі Ерғали Сәкенұлына «Үздік режиссерлік жұмыс» номинациясын жеңіп алды. Ал көрерменнің театрдағы эмоциясы күнделікті өмірдегіден өзгеше болды, бұған жас әртістердің өз рөлдерін шынайы сомдаулары әсер етті десек, артық айтқандық емес. Бұл ретте әділ қазылардың шешімімен «Үздік ер адам рөлі» номинациясы Жақсылық Құмаровқа, ал «Үздік әйел адам рөлі» номинациясы Бақытгүл Қажыкеноваға берілді.
