Желтоқсан — 86
Биыл тәуелсіздік алғанымызға 31 жыл толып отыр. Ал тәуелсіздіктің бастауы болған, қазақтың рухын біріктірген Желтоқсан оқиғасынан бері 36 жыл өтті. 16 желтоқсан – Тәуелсіздік күнінде Семей жұртшылығы Желтоқсан оқиғасы құрбандарын еске алып, қала әкімдігі ғимараты алдындағы Қайрат Рысқұлбековтің ескерткішіне гүл шоқтарын қойды. Салтанатты шараға Абай облысының әкімі Нұрлан Ұранхаев, облыс мәслихатының хатшысы Қуаныш Сүлейменов, қала әкімі Нұрбол Нұрсағатов, Желтоқсан оқиғасының куәгерлері, ардагерлер мен шаһар тұрғындары қатысты.
Дана ТАЛҒАТБЕК,
«Семей таңы»
Ескерткіш алдына жиналған қала тұрғындары елінің тәуелсіздігі жолында алаңға шығып, теңдік талап еткен қаһармандардың, қыршын кеткен боздақтардың рухына бас иіп, бір минут үнсіздікпен еске алды.
- Тәуелсіздік күні – бұл, әрине, қуанышты күн. Өйткені бұл күні қазақ халқының өз тәуелсіздігі мен өз мемлекеттілігі туралы ғасырлар бойғы армандары орындалды. Бұл ретте қазіргі Қазақстан тарихына желтоқсан деген атпен енген 1986 жылғы 16 желтоқсанда болған қайғылы оқиғаны еске түсірмей кете алмаймыз. Қанша жылдар өтсе де әлі күнге дейін балаларының бұл өмірде бар-жоғын, қайда жерленгенін білмейтін отбасыларды білемін. Тәуелсіздік бізге оңайлықпен келген жоқ, осыны есте ұстайық. Жастығына қарамастан қайсар мінез танытқан Қайрат секілді қазақ жастарының есімі ұлт тарихында мәңгі сақталады, — деді қоғам қайраткері, профессор Зейнолла Тоқаев.
Желтоқсан оқиғасына қатысқан сол кездегі жастар — бүгінде орта жасты бағындырған ел азаматтары. Солардың бірі – қаламыздағы «Желтоқсан 1986» қоғамдық қозғалысының төрағасы Тоқтарғазы Сарманов. Ол 1986 жылы Алматы қаласындағы Ауыл шаруашылығы институтында ауыл шаруашылығын электрлендіру мамандығы бойынша бірінші курста оқып жүрген.
- Біз қазақстандықтарға мүлдем беймәлім коммунистік партия қайраткері Колбинді тағайындау туралы шешімнің күшін жоюды талап етіп алаңға шықтық, себебі ел тізгінін туған жерін жанындай сүйетін, жан-тәнімен беріле еңбек ететін өз жеріміздің тумасы ұстағанын қаладық. Ал бізді нашақорлар, маскүнемдер, бүлікшілер, ұлтшылдар, тіпті айналасындағылардың бәрін қиратып, тәртіпсіздік тудырған қылмыскерлер ретінде көрсетті. Бұл әділетсіз еді,- деп сол бір ызғарлы күндерді еске түсірді Тоқтарғазы Халилулаұлы.
Өткен мен бүгінгіні таразыға салу – бүгінгі күннің міндеті. Бұл ретте тарихымызда ойып тұрып орын алған Желтоқсан оқиғасы, тәуелсіздік жолында құрбан болған жастар халықтың мәңгі есінде!
Ел егемендігі үшін басын бәйгеге тіккен батыр ұл-қыздардың ерлігі — зор құрметке лайық, жас ұрпаққа үлгі-өнеге.
