Жаңа жыл қарсаңында Семей қаласындағы Қарағайлы шағын ауданынан 64 отбасыға — халықтың әлеуметтік осал топтарына жататын және көп балалы жанұялар мен жетім балаларға көп қабатты тұрғын үйден пәтер кілттері табыс етілді. Салтанатты жиынға қала әкімі Нұрбол Нұрсағатов, қалалық тұрғын үй инспекциясы бөлімінің басшысы Диана Шаяхметова, қала тұрғындары қатысты.
Кербез ДУЛАТҚЫЗЫ,
«Семей таңы»
Қала әкімі жаңа пәтер иелерін қоныс тойларымен құттықтап, бұл ауданда құрылыс қарқыны ары қарай да арта түсетінін атап өтті.
— Жаңа жыл қарсаңында тұрғын үйге мұқтаж азаматтарға қуаныш сыйлайтын сәтке куә болып тұрмыз. Осы жылдың қазан айында да 64 отбасыға жаңа пәтердің кілттері табыс етілген болатын. Бүгін, міне, тағы 64 отбасы баспаналы болмақ. Пәтер иелерін осындай айтулы күнмен шын жүректен құттықтаймын! Жаңа жыл семейліктер үшін берекелі болып, барша шаңыраққа қуаныш әкелсін! — деді Нұрбол Төлегенұлы.
Қалалық тұрғын үй инспекциясы бөлімінің басшысы Диана Шаяхметова өз сөзінде баспаналар талай жылдан бері кезекте тұрған тұрғындарға жалдау шарты бойынша берілгенін айтып өтті. Оның сөзінше, бұл баспаналар сатып алу құқығынсыз жалға беріледі. Отбасылар бұл пәтерлерде жалдау шарты бойынша тұрады. Ай сайынғы жарнаға сәйкес белгілі бір төлем болады. Яғни пәтер иелері ай сайын жалдау ақысы мен коммуналдық қызметтер үшін бюджетке ақы төлейді. Жалдау ақысы бөлмелер санына байланысты, бір бөлмелі, екі және үш бөлмелі пәтерлер бар. Төлем 10 мың теңгеден 16 мың теңгеге дейін тұрғын үйдің шаршы метріне байланысты келеді.
Еске сала кетсек, аталған шағын ауданда Назарбаев Зияткерлік мектебі, 320 орындық балабақша, 5600 орындық «Арена» мәдени-спорттық кешені орналасқан. Семей қаласының оң жағалау бөлігінде, бекітілген бас жоспарға сәйкес, Қарағайлы тұрғын ауданын егжей-тегжейлі жоспарлау жобасы әзірленген. Жоба бойынша алдағы уақытта 227 тұрғын үй салынып, ауданда 35 мыңнан аса адам тұратын болады.
